Pasiteri Julienne Kabanda niwe uzaganiriza ijambo ry'Imana abazitabira Praise Unlimited izabera muri BK Arena

Halal Afrika igiye gutaramira abakunzi b’indirimbo zo kuramya no guhimbaza Imana mu gitaramo cya Praise Unlimited Halal Afrika, umuryango uzwi mu gutegura ibikorwa by’umuziki wa Gospel, wateguye igitaramo gikomeye cyiswe “Praise Unlimited Live Recording Concert”, kizabera muri BK Arena i Kigali ku Cyumweru, tariki ya 25 Ukwakira 2026, guhera saa kumi n’imwe z’umugoroba. Iki gitaramo kizaba kigamije guhuriza hamwe abakunzi b’indirimbo zo kuramya no guhimbaza Imana, binyuze mu muziki n’ibihe byo guterana inkunga mu kwizera. Kuba ari igitaramo cyo gufata amashusho n’amajwi mu buryo bwa Live Recording, bizatuma ibizakirangwamo bibikwa kugira ngo bizabashe kugera no ku batazabasha kwitabira iki gikorwa imbonankubone. Mu bahanzi n’amatsinda bazitabira iki gitaramo harimo Israel Mbonyi, Ben & Chance, Evelyn Wanjiru, Bella Kombo, Grace Charles, Rene & Tracy, Joe Mettle, Lebo Sekgobela, Emeka Donge, ndetse na OnceMore Six, ugaragara ku byapa byamamaza iki gitaramo nk’umwe mu bazaririmba. Hazanitabira itsinda rya True Promises Ministries, rizwi mu ndirimbo zo kuramya no guhimbaza Imana. Umwihariko w’iki gitaramo ni uko kizahuza abahanzi bo mu bihugu bitandukanye, bityo kikaba umwanya wo gusangira impano, ubutumwa bwiza n’umuco wo kuramya Imana binyuze mu ndirimbo. Abazitabira bazabona umwanya wo kumva indirimbo zizwi, izindi nshya ndetse n’ibihe byihariye byo guhimbaza Imana. Uretse abahanzi, igitaramo cya Praise Unlimited kizitabirwa na Pasiteri Julienne Kabiligi Kabanda, utegerejwe gutanga ubutumwa bw’Ijambo ry’Imana. Ni umushumba akaba n’umuvugabutumwa uzwi mu Rwanda, washinze Grace Room Ministries ikorera i Nyarutarama mu Mujyi wa Kigali. Yatangiye kubwiriza afite imyaka 18, kandi tariki ya 16 Gicurasi 2018 ni bwo yahawe inshingano z’ubushumba, anatangiza ku mugaragaro Grace Room Ministries. Pasiteri Julienne Kabanda azwi cyane mu nyigisho zishingiye ku Ijambo ry’Imana, zihuza inyigisho za Bibiliya n’ubuzima bwa buri munsi. Ibikorwa bye birimo no kwita ku mibereho y’abaturage, kurwanya ibiyobyabwenge mu rubyiruko no gufasha abatishoboye. Yashinze kandi ishuri rya High Hopes School rigamije gufasha abana bafite ubumuga bwo mu mutwe. Igitaramo cya Praise Unlimited kizabera muri BK Arena, imwe mu nyubako nini ziberamo ibitaramo n’ibikorwa bitandukanye mu Rwanda. Gutegura igikorwa nk’iki gifite abahanzi benshi baturutse mu bice bitandukanye by’Isi bigaragaza intego yo guhuza abakunzi ba Gospel no gukomeza kugeza ubutumwa bwiza ku bantu benshi binyuze mu muziki. Amatike yo kwinjira muri iki gitaramo yamaze gushyirwa ku isoko, akaba aboneka ku rubuga rwa [www.ticqet.rw](http://www.ticqet.rw) cyangwa umuntu agahamagara kode ya *513*1*2#. Abategura iki gitaramo barahamagarira abakunzi b’indirimbo zo kuramya no guhimbaza Imana kwitabira iki gikorwa kizaba ku Cyumweru, tariki ya 25 Ukwakira 2026, saa kumi n’imwe z’umugoroba, muri BK Arena i Kigali.