Aline Gahongayire yateguje igitaramo cyo kwizihiza imyaka 40 y’amavuko n’isaga 20 amaze mu muziki

Aline Gahongayire yateguje igitaramo cyo gushimira Imana ku myaka 40 y’amavuko n’isaga 20 amaze mu muziki Umuhanzikazi w’indirimbo zo kuramya no guhimbaza Imana, Aline Gahongayire, yateguje igitaramo cyihariye yise “Ndanyuzwe Thanksgiving Gala Night”, kizaba umwanya wo gushimira Imana ku bw’imigisha yamuhaye mu myaka 40 amaze ku Isi no mu rugendo rw’imyaka isaga 20 amaze mu muziki. Iki gitaramo giteganyijwe ku wa Gatandatu, tariki ya 12 Ukuboza 2026, muri Kigali Serena Hotel, kikaba cyitezweho guhuza abakunzi b’umuziki wa Gospel n’abandi bazaba bifatanyije na we muri uyu munsi wihariye wo kwizihiza intambwe amaze gutera mu buzima no mu muziki. “Ndanyuzwe Thanksgiving Gala Night” ni igitaramo kizaba kirimo ibikorwa bitandukanye birimo kwakirwa ku itapi itukura, gusangira ifunguro rya nimugoroba no kwidagadura mu gitaramo cy’umuziki wa Gospel. Aline Gahongayire azataramana n’abazacyitabira aherekejwe n’itsinda ry’abacuranzi be. Aline Gahongayire yasobanuye ko iki gitaramo kitazaba icyo kuririmba gusa, ahubwo kizaba n’umwanya wo gusabana, gusangira no kuzirikana ibyiza Imana yamukoreye mu rugendo rw’ubuzima bwe. Uyu muhanzikazi azaba yizihiza imyaka 40 y’amavuko, ari na ko ashimira Imana yamufashije gukomeza urugendo rwe mu muziki mu gihe kirenga imyaka 20. Ni intambwe ikomeye kuri we, urebye urugendo amaze gukora mu gukorera Imana binyuze mu bihangano bye. Mu myaka amaze mu muziki, Aline Gahongayire yamenyekanye mu ndirimbo zo kuramya no guhimbaza Imana zirimo ubutumwa bw’ihumure, ukwizera, gushima no gukomeza kwiringira Imana mu bihe bitandukanye by’ubuzima. Ibi byatumye agira umwanya wihariye mu mitima y’abakunzi b’umuziki wa Gospel mu Rwanda. Ibihangano bye byagiye bifasha benshi kubona imbaraga zo gukomeza urugendo rwo kwizera, by’umwihariko abahuye n’ibigeragezo n’ibibazo bitandukanye. Mu gihe amaze akora umuziki, yakomeje gukoresha impano ye mu kugeza ku bantu ubutumwa bwubaka imitima kandi bukabibutsa gukomera ku Mana. Aline Gahongayire kandi ni umwe mu bahanzi b’abagore bamaze igihe kinini mu muziki wa Gospel mu Rwanda, aho ibikorwa bye byagiye bigira uruhare mu gukomeza guteza imbere umuziki wo kuramya no guhimbaza Imana. Kwizihiza iyi myaka yose abihuza no gushimira abantu bagiye bamushyigikira, bakamuba hafi kandi bakamufasha gukomeza umurimo we. “Ndanyuzwe Thanksgiving Gala Night” iteganyijwe kuba umugoroba wihariye uzarangwa n’umuziki wa Gospel, gusangira no gushimira Imana. Abifuza kwitabira iki gitaramo bashobora kubona amakuru ajyanye n’itike n’uburyo bwo kwiyandikisha banyuze ku makuru yatangajwe n’uyu muhanzi, aho nimero zo guhamagara ari +250 788 316 002 na +250 788 314 903.