Abakora sinema mu Rwanda bagiye guhabwa amahirwe yo kugera ku isoko mpuzamahanga binyuze muri Mashariki Film Festival

Abakora sinema mu Rwanda n’abo mu bindi bihugu bya Afurika bagiye kongererwa amahirwe yo kumenyekanisha ibihangano byabo ku rwego mpuzamahanga, binyuze mu iserukiramuco rya Mashariki African Film Festival rizabera i Kigali mu mpera z’Ugushyingo 2026. Iri serukiramuco riteganyijwe kuva ku wa 23 kugeza ku wa 29 Ugushyingo 2026, rikaba rizaba ku nshuro ya 12. Rizahuza abakora filime, abazibyaza umusaruro, abandika inkuru, abashinzwe kuzikwirakwiza ndetse n’abandi banyamwuga bafite aho bahuriye n’uruganda rwa sinema. Kimwe mu bikorwa byitezweho kuzagira uruhare rukomeye muri iri serukiramuco ni Masharket, isoko mpuzamahanga ry’ibihangano by’amashusho rizahuza abakora sinema n’abashobora kubafasha kugeza imishinga yabo ku masoko atandukanye. Iki gikorwa giteganyijwe kuva ku wa 27 kugeza ku wa 29 Ugushyingo 2026, kikazatanga umwanya wo kugaragaza imishinga ya filime, kuganira ku bufatanye bushya no gushaka uburyo ibihangano nyafurika byagera ku bantu benshi. Mu ruganda rwa sinema, gukora filime nziza ntibihagije kugira ngo igere ku rwego mpuzamahanga. Hakenewe kandi ubushobozi bwo kuyibyaza umusaruro, kuyimenyekanisha, kubona abafatanyabikorwa no kuyigeza ku masoko ashobora kuyigura cyangwa kuyikwirakwiza. Ni muri urwo rwego Masharket ifatwa nk’urubuga rushobora gufasha abakora sinema bo mu Rwanda kwagura imikoranire yabo, guhura n’abashoramari ndetse n’abashinzwe kugura no gukwirakwiza ibihangano by’amashusho. Iyi gahunda kandi ije mu gihe Mashariki ikomeje kwagura ibikorwa byayo, birimo n’ibijyanye n’ubumenyi. Mu rwego rw’iri serukiramuco, hazatangwa impamyabumenyi ku banyeshuri ba mbere barangije muri Mashariki Arts Academy, ishuri rigamije gufasha abafite impano mu bijyanye na sinema n’ubuhanzi kunguka ubumenyi ngiro. Abategura iri serukiramuco banateganyije amahugurwa n’ibiganiro bizahuza urubyiruko n’abamaze kugira ubunararibonye muri sinema, hagamijwe gufasha abakizamuka kumenya uko bakwiteza imbere muri uru rwego. Ku rundi ruhande, uruhererekane rwa filime ruzaba rugizwe n’ibihangano 80 byatoranyijwe, birimo iz’Abanyarwanda n’iz’abandi Banyafurika. Izi filime zizerekanwa mu byiciro bitandukanye birimo filime ndende, izigufi, filime mbarankuru na za serivise z’amashusho. Mu bihangano by’u Rwanda byatoranyijwe mu cyiciro cyihariye harimo Bridge of Christmas, Hands of Hope, Rukuruzi na The Bride. Hari kandi filime What a Day ya Niyitegeka Gratien na Denis Iriniga iri mu bahatanira ibihembo mu cyiciro cya filime ndende. Insanganyamatsiko y’uyu mwaka ni Reels of Resilience, igaragaza ubushobozi bwa sinema nyafurika bwo kuvuga inkuru zishingiye ku mateka, umuco, imibereho n’ubushobozi bw’abaturage bwo guhangana n’ibibazo. Iri serukiramuco rizabera i Kigali mu gihe u Rwanda rukomeje gushyira imbaraga mu guteza imbere urwego rw’ubuhanzi n’ibikorwa ndangamuco. Kuba abakora sinema bo mu Rwanda bahurira n’abo mu mahanga bishobora kubafungurira amarembo mashya, haba mu kubona abafatanyabikorwa, ubumenyi ndetse n’amasoko y’ibihangano byabo. Mashariki African Film Festival ya 2026 izaba kuva ku wa 23 kugeza ku wa 29 Ugushyingo, mu gihe Masharket izaba kuva ku wa 27 kugeza ku wa 29 Ugushyingo 2026, i Kigali.