Horeb Choir itegerejwe muri KAPPARAH Live Concert yahaye imitima ihumure mu ndirimbo “Ishyanga”

Horeb Choir itegerejwe muri KAPPARAH Live Concert yahaye imitima ihumure mu ndirimbo “Ishyanga” Horeb Choir itegerejwe muri KAPPARAH Live Concert yahaye imitima ihumure mu ndirimbo “Ishyanga” Hari abantu isi ibona nk’abatagira agaciro, nyamara mu maso y’Imana ari ab’igiciro cyinshi. Ubutumwa buri mu ndirimbo “Ishyanga” ya Horeb Choir Post Cepiens UR Gikondo ni ihumure ku wizera wumva aremerewe n’ibibazo, umwibutsa ko ibyo anyuramo bitavanaho amasezerano y’Imana ku buzima bwe. Mu buzima hari igihe umuntu anyura mu bihe bikomeye, agasuzugurwa, akabura ubufasha ndetse n’abo yiringiraga bakamutererana. Icyo gihe ashobora kwibaza niba agifite agaciro cyangwa niba hari icyizere cy’ejo hazaza. Ariko ku muntu wamenye Imana, hari ubutunzi butagaragarira amaso y’abantu. Ni ubutumwa Horeb Choir Post Cepiens UR Gikondo yashyize mu ndirimbo yayo “Ishyanga”, yibutsa abakristo ko agaciro kabo kadashingira ku byo batunze, ku cyubahiro bafite mu bantu cyangwa ku bibazo bahura na byo. Iyi ndirimbo ihumuriza imitima, igasubiza icyizere abacitse intege, ikanibutsa abizera ko hari igihe abantu bashobora kutabona agaciro kabo, nyamara Imana yo ikaba izi neza abo ari bo n’amasezerano yabahaye. “Ishyanga” ni ubutumwa bwibutsa abakristo agaciro bafite imbere y’Imana Mu kiganiro yagiranye na Paradise, Bwana Kagenza Ernest, uyoboye Horeb Choir Post Cepiens UR Gikondo, yavuze ko “Ishyanga” ari ubutumwa Umwuka Wera yageneye Itorero ry’Imana, kugira ngo ryongere kwibuka agaciro rifite mu isi y’umwuka. Yagize ati: “Iyi ndirimbo iributsa abari mu Itorero ry’Imana ko babikijwe ibyavuzwe n’Imana, bakaba bafite ubutunzi butagira akagero.” Yakomeje asobanura ko umugisha ukomeye ku muntu ari ukumenya Imana na yo ikamumenya, akayoborwa n’Umwuka Wera mu nzira ze zose. Yavuze ko nubwo umuntu ashobora kubaho adafite ubutunzi bugaragarira buri wese, ibyo bitavuze ko adafite agaciro cyangwa ko Imana yamutereranye. Kagenza yavuze ko abantu batamenye ibanga ry’umwuka riri mu buzima bw’undi bashobora kumufata nk’udafite agaciro, nyamara Imana iba ifite umugambi kuri we. Yasobanuye ko hari igihe umuntu agira ituze, akihangana kandi ntahite agaragaza ibyo yizera byose, mu gihe arimo gusigasira amasezerano y’Imana no guhangana n’ibigeragezo by’ibihe. Ati: “Ariko nyuma y’igihe runaka Imana iramanuka igatabara ishyanga ryayo, uwari insuzugurwa akaba ikirangirire.” Uyu muyobozi yibukije kandi ko ubutunzi bw’ishyanga ry’Imana butagarukira ku by’iyi si, kuko abizera bafite n’ibyiringiro by’igihembo cy’iteka. Yifashishije amagambo ari muri 2 Timoteyo 4:6-8, agaragaza ko abasoza urugendo rwo kwizera ari abategereje ikamba ryo gukiranuka, Imana izaha abayikunda kandi bagakomeza kuyubaha. “Basa n’abatamenyekana, nyamara ni ibirangirire” Mu magambo akora ku mutima agize iyi ndirimbo, Horeb Choir iririmba iti: “Hariho ishyanga rituye ukwaryo, rifite Imana irihora hafi. Abayuda nyakuri babitse ibyavuzwe n’Imana, bafite ubutunzi butagira akagero. Basa n’abatamenyekana nyamara ni ibirangirire, basa n’abagiye gupfa nyamara bafite ubuzima.” Aya magambo agaragaza itandukaniro riri hagati y’uko abantu bashobora kubona undi n’uko Imana imubona. Umuntu ashobora kutagira icyubahiro mu bantu, ariko agakomera mu kwizera no mu byiringiro afite muri Kristo. Indirimbo ikomeza kwibutsa abizera ko Imana idatererana abo yasezeranyije, ikabagereranya n’abantu yatoranyije ikabaronse binyuze mu gitambo cy’Umwana wayo. Ni ubutumwa bw’ihumure ku muntu wumva ko ubuzima bwamunaniye, umwibutsa ko agaciro ke kadashingiye ku isura y’ibihe arimo, ahubwo ko akwiriye gukomeza kwizera no gushikama mu Mana. Horeb Choir, urugendo rw’imyaka hafi makumyabiri mu ivugabutumwa Horeb Choir Post Cepiens UR Gikondo ni umutwe w’abaririmbyi ukorera umurimo w’Imana muri ADEPR SGEEM, ugizwe ahanini n’abanyeshuri barangije amasomo muri Kaminuza y’u Rwanda, Ishami rya Gikondo, n’abandi bahuriye ku muhamagaro wo kuramya no guhimbaza Imana. Nk’uko Paradise yagiye ibitangaza mu nkuru z’amateka yayo, Horeb yatangiye ivugabutumwa mu 2007, itangijwe n’abanyeshuri b’Abapentekote bigaga muri KIST, nyuma bakaza kwimurirwa mu cyahoze cyitwa SFB. Mu ntangiriro yari igizwe n’abaririmbyi 15, ariko yagiye yaguka uko imyaka yagiye ihita. Mu 2019 ni bwo havutse Horeb Choir Post Cepiens UR Gikondo, hagamijwe gukomeza kubumbatira umuryango w’abaririmbyi bahoze muri Horeb, nubwo bamwe bari barangije kaminuza bakajya mu bindi bigo cyangwa mu buzima busanzwe. Mu myaka yakurikiyeho, Horeb yakomeje gukora indirimbo z’amajwi n’amashusho, ibitaramo n’ibikorwa by’ivugabutumwa. Yagiye inakora ibikorwa by’ubufatanye n’urukundo, igamije kugeza ubutumwa bwa Kristo ku bantu mu buryo butandukanye. Iyi nzira ni yo ikomeje kuyifasha kugeza ku bakunzi bayo indirimbo zishingiye ku Ijambo ry’Imana, zigamije kubaka ukwizera no guhumuriza abababaye. KAPPARAH Live Concert: Ubutumire bwo kugarukira Kristo Mu gihe abakunzi ba Horeb Choir bakomeje kwakira ubutumwa buri mu ndirimbo zayo, iyi korali iri no mu myiteguro ya KAPPARAH Live Concert, igiterane cy’iminsi itatu giteganyijwe kuva ku wa 13 kugeza ku wa 15 Ugushyingo 2026. Nk’uko Paradise yabitangaje, iki giterane kigamije kwibutsa abantu ko Yesu Kristo ari we Mukiza ukuraho ibyaha, akagarura umuntu ku Mana. Kizaba umwanya wo kuramya no guhimbaza Imana, kwigishwa Ijambo ryayo no guhemburwa mu buryo bw’umwuka. Bwana Kagenza Ernest yasobanuye ko izina “KAPPARAH” rifite inkomoko mu Isezerano rya Kera, aho rifitanye isano no guhongerera ibyaha, nk’uko bigaragara mu Abalewi 16:30. Yagaragaje ko mu Isezerano Rishya, ubutumwa bwibanda kuri Yesu Kristo ukuraho ibyaha, bityo buri muntu agahamagarirwa kumwakira mu mutima. Iki giterane nticyateguriwe gusa abatarakira Kristo, ahubwo ni n’umwanya ku bamaze kumwemera wo kongera kwibuka agaciro k’agakiza bahawe no gushikama mu kwizera. Ni muri urwo rwego indirimbo “Ishyanga” ishobora gufatwa nk’ubutumwa bujyanye n’uyu muhamagaro: kwibutsa abantu ko Imana ibazi, ko ibakunda kandi ko ibahamagarira kuyegera. Indirimbo izakomeza guhumuriza n’ibisekuru bizaza? “Ishyanga” si indirimbo ishingiye ku byishimo by’akanya gato. Ni ubutumwa bwubakiye ku kwizera, ibyiringiro n’amasezerano y’Imana, ku buryo umuntu uyumvise ashobora kuyihuza n’ibyo anyuramo mu buzima bwe. Ubutumwa bwayo burenze kuba ubw’abaririmbyi cyangwa itsinda runaka ry’abantu. Ni ubw’umuntu wese wigeze kumva ko yasuzuguwe, uwigeze gucika intege, uwabuze uwo yiringira cyangwa uwibaza niba hari ejo heza ateganyirijwe. Iyo umuntu yumvise amagambo yayo, asigarana ikibazo cyo kwibaza niba koko uko isi imubona ari ko Imana imubona. Kuri Horeb Choir, igisubizo kiri mu butumwa bw’indirimbo: umuntu ufite Imana afite impamvu yo gukomeza kwizera, n’igihe ibihe arimo bitamworoheye. Mu gihe amashusho n’amajwi by’indirimbo bikomeje kugeza ubu butumwa ku bayumva, “Ishyanga” yibutsa ko indirimbo y’umwuka ishobora kurenga igihe yasohokeyeho, igakomeza kuvugana n’abazayumva mu bihe bitandukanye. Ni ubutumwa buhumuriza, bukomeza imitima kandi bugahamagarira abantu kudapima agaciro kabo bakurikije uko isi ibabona. Kuri Horeb Choir Post Cepiens UR Gikondo, urugendo rurakomeje: kuririmba, kuramya, guhimbaza no kugeza abantu kuri Kristo. KAPPARAH Live Concert ni imwe mu ntambwe ziteganyijwe muri uwo muhamagaro, mu gihe “Ishyanga” ikomeza kwibutsa abakunzi bayo ko n’uwumva atagaragara mu maso y’abantu ashobora kuba afite agaciro gakomeye imbere y’Imana.