Umwana ukivuka yagaragaye afite ubwanwa nk’ubw’umuntu mukuru, amashusho ye akwira ku mbuga nkoranyambaga.

Amashusho y’umwana ukivuka wagaragaye afite ubwanwa bwinshi ku munwa no ku matama amaze iminsi akwirakwira cyane ku mbuga nkoranyambaga, asiga benshi batangaye bibaza niba koko hari umwana wavuka afite isura imeze nk’iy’umuntu mukuru. Muri ayo mashusho, umwana agaragara aryamye ku buriri bwo kwa muganga, ari mu gitambaro cy’umweru, afite umusatsi mwinshi ku mutwe ndetse n’ubwanwa bwijimye bugaragara cyane hejuru y’umunwa. Iyo urebye ifoto bwa mbere, bishobora gutuma umuntu yibaza niba koko umwana yaba yaravutse afite moustache nk’iy’umuntu mukuru. Amashusho yakwirakwiye ku muvuduko ukomeye kuva mu mpera z’icyumweru gishize, abantu benshi bayatangaho ibitekerezo bitandukanye. Bamwe babishyize mu rwenya bavuga ko uyu mwana asa n’uwavutse amaze kugira imyaka y’ubukure, abandi bamwita umuntu wavutse afite ubuzima bw’umuntu mukuru ndetse bamwe bavuga ko asa n’uwamaze igihe kinini akora akazi ko mu biro. Ariko nyuma y’uko aya mashusho akomeje gukwirakwira, havutse ikindi kibazo gikomeye: Ese koko ubu bwoya ni ubw’umwana cyangwa amashusho yaba yarahinduwe? Abagenzuzi b’amakuru bayasesenguye bagaragaje ibimenyetso bituma hakekwa ko ubwanwa bwashyizwe kuri aya mashusho hakoreshejwe ikoranabuhanga. Mu bice bimwe by’amashusho, ubwanwa busa n’ubuhindura ibara aho buri uko umwana agenda ahindura umutwe, ndetse hari aho bigaragara nk’aho bubura cyangwa bugahinduka mu buryo budahuye neza n’imigendekere y’isura y’umwana. Nta bitaro, umuganga cyangwa umuryango w’uyu mwana byigeze bitangazwa ku buryo bwizewe ngo hemezwe ko uyu mwana yavukiye ahantu runaka kandi ko koko yavutse afite ubwo bwanwa. Hari inyandiko zamwitiriye igihugu cya Ecuador, ariko na byo ntibyabonye gihamya yigenga ihagije. Ese umwana ashobora kuvuka afite ubwoya ku maso? Mu by’ukuri, abana bamwe bashobora kuvuka bafite ubwoya bworoshye cyane bwitwa lanugo. Ubu bwoya bukura ku mubiri w’umwana akiri mu nda kandi bushobora kugaragara ku bice bitandukanye by’umubiri, harimo no mu maso. Akenshi buba bworoshye kandi bugenda bugabanuka nyuma yo kuvuka. Icyakora, lanugo ntiba imeze nk’ubwanwa bw’umuntu mukuru bwijimye kandi bushushanyije neza nk’ubugaragara muri aya mashusho. Ni yo mpamvu abasesenguzi bavuga ko isura y’ubwanwa iri muri iyi video idakwiye gufatwa nk’ikimenyetso cy’uko umwana yavukanye moustache nyayo. Ikindi cyatumye aya mashusho akomeza kuvugisha abantu ni uburyo ikoranabuhanga rya AI n’izindi porogaramu zo guhindura amashusho zimaze gutera imbere. Ubu birashoboka gufata amashusho y’umuntu nyakuri, ugashyiraho ikintu ku isura ye ku buryo umuntu utabisesenguye neza ashobora kwemera ko ari ukuri. Nkaya mashusho ya perizida wa America Donald Trump. Kuri uyu mwana, abasesenguzi bavuga ko bishoboka cyane ko umwana ubwe ari umwana nyakuri uri mu mashusho, ariko ubwanwa bwagaragajwe ku isura ye bukaba ari bwo bwahinduwe cyangwa bwashyizweho hakoreshejwe ikoranabuhanga. Icyakora, nta nyandiko ya tekiniki y’umwimerere yasohotse ngo hemezwe neza porogaramu yakoreshejwe. Inkuru y’uyu mwana rero yongeye kwerekana uburyo ifoto cyangwa video imwe ishobora gutuma internet yose ivuga mu gihe gito cyane. Icyakora, nk’uko bigenda ku makuru menshi akwirakwira ku mbuga nkoranyambaga, kuba amashusho afite abantu benshi bayatangaho ibitekerezo no kuyasangiza abandi ntibihita bivuga ko ibyo agaragaza ari ukuri. Kugeza ubu, ikintu gishobora kuvugwa mu buryo bwizewe ni uko amashusho y’umwana ufite isura isa n’iy’umuntu mukuru yagiye viral, ariko nta gihamya yizewe irahari yemeza ko uyu mwana yavukanye ubwo bwanwa; ahubwo ibimenyetso byasesenguwe bigaragaza ko amashusho ashobora kuba yarahinduwe mu buryo bwa digital cyangwa AI.