Nahimana Thomas Ashobora Kwamburwa Ubupadiri Burundu

Kiliziya Gatolika yatangiye inzira zishobora gutuma Nahimana Thomas atakaza burundu ubupadiri, nyuma y’uko yishoye mu bikorwa bya politiki ku mugaragaro. Ibi byatangajwe na Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, wavuze ko muri ibyo bikorwa harimo n’ibyo kumupfobya Jenoside yakorewe Abatutsi mu 1994. Mu kiganiro Urubuga rw’Itangazamakuru cyo ku wa 25 Ukwakira 2026, Minisitiri Bizimana yavuze ko ikibazo cya Nahimana kiri mu bibangamiye ubumwe bw’Abanyarwanda, cyane cyane mu bijyanye n’imyitwarire ya bamwe mu bantu bari mu nzego z’amadini. Yasobanuye ko nubwo ubupadiri ari umuhamagaro umuntu ahabwa ubuzima bwe bwose, hari inzira Kiliziya ishobora gukoresha kugira ngo ibukurireho umuntu burundu. Yavuze ko amakuru bafite agaragaza ko iyo nzira yatangiye kuri Nahimana, ariko ko itaragera ku musozo. Minisitiri Bizimana yavuze ko icyemezo nk’icyo kitafatwa ako kanya, kuko kigomba kunyura mu nzego zibishinzwe za Kiliziya Gatolika, ku cyicaro cyayo i Vatican. Ntiyashoboye kuvuga igihe gishobora kuzafatira kugira ngo icyo gikorwa kirangire. Ibyo yabivuze mu gihe u Rwanda rukomeje urugendo rwo kwimakaza ubumwe bw’Abanyarwanda, aho ibipimo byabwo bikiri kuri munsi ya 100% ku kigero cya 4,7%. Minisitiri yagaragaje ko nubwo Kiliziya Gatolika yamaze gusaba imbabazi ku ruhare rwayo muri Jenoside yakorewe Abatutsi, hakiri abantu ku giti cyabo bagaragaza imyitwarire inyuranye n’intego z’ubumwe n’ubwiyunge. Yatanze urugero rwa bamwe mu bapadiri bakora ibikorwa bya politiki bishobora kubangamira izo ntego. Nahimana Thomas yakoreye ubutumwa muri Diyosezi Gatolika ya Cyangugu, mu Karere ka Rusizi, mbere yo kuva mu Rwanda mu 2005. Icyo gihe yavuze ko ahunze kubera impungenge z’umutekano we, nyuma yerekeza i Burayi, aho yakiriwe muri Diyosezi ya Le Havre mu Bufaransa. Aho yari amaze kugera mu Bufaransa, yatangiye ibikorwa bya politiki, birimo gufatanya na Fortunatus Rudakemwa gushinga urubuga rwa interineti rwitwa Le Prophète. Urwo rubuga rwakoreshejwe mu gutangaza ubutumwa Minisitiri Bizimana ashinja gukwirakwiza urwango no gupfobya Jenoside yakorewe Abatutsi. Mu 2013, Nahimana yashinze ishyaka rya politiki yise Ishema ry’u Rwanda, ku wa 28 Mutarama. Nyuma yatangaje ko afite umugambi wo kwiyamamariza kuyobora u Rwanda mu matora ya Perezida wa Repubulika yo mu 2017, ariko ntiyagaruka mu gihugu ngo ayitabire. Kuva icyo gihe, yakomeje ibikorwa bye bya politiki ari mu Bufaransa, arimo kunenga no kurwanya ubutegetsi bw’u Rwanda, ndetse no gukorana n’abandi batavuga rumwe na bwo.