Sam Rwibasira na True Promises bazaririmba muri “Selah Concert III” ya New Melody Choir
New Melody Choir yateguje igitaramo “Selah Concert III”, izahuriramo Sam Rwibasira na True Promises New Melody Choir, itsinda ry’abaririmbyi b’indirimbo zo kuramya no guhimbaza Imana, ryateguye igitaramo cyiswe “Selah Concert III”, giteganyijwe kuba ku Cyumweru tariki ya 8 Ugushyingo 2026, kikazabera i Camp Kigali guhera saa cyenda z’amanywa. Iki gitaramo ni kimwe mu bikorwa New Melody Choir ikomeje gukora mu rwego rwo guteza imbere umuziki wa Gospel, guhuza abakunda kuramya no guhimbaza Imana no kugeza ubutumwa bwiza ku bantu batandukanye binyuze mu ndirimbo n’ibihe byihariye byo kuramya no gusenga. Mu bahanzi n’amatsinda azaririmba muri iki gitaramo harimo Sam Rwibasira, wemejwe nk’umwe mu bazafasha abazitabira kubona ibihe byo kuramya no guhimbaza Imana. Uyu muhanzi azifatanya na New Melody Choir n’abandi bazaririmba muri iki gikorwa. Itsinda rya True Promises na ryo ryamaze gutangazwa muzashyigikira iki gitaramo binyuze mu ndirimbo zo kuramya no guhimbaza Imana. True Promises Ministries ni itsinda rizwi mu muziki wa Gospel mu Rwanda, rimaze imyaka rikora umurimo wo kwamamaza ubutumwa bwa Yesu Kristo binyuze mu bihangano byaryo. Itangazo ry’iki gitaramo rigaragaza ko amatike yamaze kujya ku isoko, aho abifuza kwitabira bashobora guhitamo ibyiciro bitandukanye birimo Silver y’amafaranga 5.000 Frw, Gold y’amafaranga 10.000 Frw, Platinum y’amafaranga 20.000 Frw na Sponsor y’amafaranga 50.000 Frw. Ibi byiciro byashyizweho kugira ngo abantu babashe guhitamo bitewe n’ubushobozi bwabo n’uburyo bifuza gushyigikira igikorwa. “Selah Concert III” ije ikurikira ibindi bikorwa New Melody Choir imaze igihe ikora mu rwego rwo gukomeza gukwirakwiza ubutumwa bwiza. Iri tsinda rigizwe n’abaririmbyi barimo Bosco Nshuti, Josue Shimwa, Jado Sinza, Neema Marie Jeanne na Emeline Penzi, rikaba rizwiho guhuza kuramya no guhimbaza Imana n’ibikorwa bigamije gukomeza abantu mu kwizera. Uretse Sam na true promise,Papi Clever na Dorcas, batangajwe nk’abahanzi ba mbere bazafatanya na ryo mu kuramya no guhimbaza Imana mu gitaramo gikomeye. Ibi bigaragaza ko iri tsinda rikomeje kwagura ubufatanye n’abandi bahanzi kugira ngo rirusheho kugera ku bakunzi ba Gospel. Abazitabira “Selah Concert III” bazahurira muri Camp Kigali ku Cyumweru tariki ya 8 Ugushyingo 2026, guhera saa cyenda z’amanywa, mu gitaramo gitegerejweho guhuza abaramya Imana mu bihe by’amasengesho, indirimbo n'ijambo ry'Imana ,New Melody Choir ikomeje gutegura iki gikorwa, mu gihe abakunzi bayo n’abandi bakunda umuziki wa Gospel bitegura kuzacyitabira mu bwinshi.