Vestine na Dorcas ntibazitabira Vancouver Worship Encounter

Abahanzi b'indirimbo zo kuramya no guhimbaza Imana, Vestine na Dorcas, batangaje ko batazabasha kwitabira igitaramo cya Vancouver Worship Encounter cyari gitegerejwe n'abakunzi babo. Mu butumwa aba bahanzi basangije abakunzi babo ku mbuga nkoranyambaga, batangaje ko gahunda yo kwitabira iki gitaramo itagikomeje, bavuga ko byatewe n'ibibazo bitari byitezwe byaturutse ku bategura igitaramo.

Vestine na Dorcas basabye imbabazi abakunzi babo bari biteguye kuzababona kuri iki gitaramo, banashimira buri wese ukomeje kubashyigikira. Mu butumwa bwabo bagize bati: "We are truly sorry for any inconvenience this may cause. We love and appreciate your constant support." Bashimangiye ko bababajwe n'ingaruka iki cyemezo gishobora guteza abafana babo.

Abafana bari babategereje Vancouver Worship Encounter yari mu bikorwa byari bitegerejwe n'abakunzi b'umuziki wo kuramya no guhimbaza Imana, ndetse kuba Vestine na Dorcas batakibashije kuyitabira ni inkuru ishobora kubabaza bamwe mu bari bateguye kuzajya kubabona. Nubwo batangaje impamvu rusange yatumye batitabira, ntibarasobanura mu buryo burambuye ibibazo byavutse hagati yabo n'abategura igitaramo. Abakunzi babo bakomeje gutegereza ibisobanuro birambuye niba hari ibindi bizatangazwa kuri iyi gahunda.

Vestine na Dorcas basoje ubutumwa bwabo bashimira abakunzi babo ku rukundo n'inkunga bahora babaha, banizeza ko bazakomeza gusangira na bo ibihe byiza binyuze mu muziki wabo.

Reba Indirimbo Nshya Ya Vestine na Dorcas👇👇