Umugabo wa Perezida Samia Suluhu Hassan yitabye Imana

Tanzania - 7 Nzeri 2026: Hafidh Ameir Hassan, umugabo wa Perezida wa Tanzania, Samia Suluhu Hassan, yitabye Imana kuri uyu wa Mbere, tariki ya 7 Nzeri 2026, ubwo yari arimo kuvurirwa mu bitaro byo muri Zanzibar.

Amakuru yatangajwe na Visi Perezida wa Tanzania, Deogratius Ndejembi, avuga ko Hafidh Ameir yapfuye ahagana saa 08:00 za mu gitondo, mu bitaro bya Emilio Mzena Memorial Hospital i Zanzibar, aho yari arimo kuvurirwa indwara y'umutima. Ndejembi yagejeje ku baturage ba Tanzania inkuru y'urupfu rwa Hafidh Ameir, anihanganisha Perezida Samia Suluhu Hassan, umuryango we, inshuti ndetse n'Abanya-Tanzania muri rusange.

Yari muntu ki? Hafidh Ameir Hassan yari azwi cyane nk'umuhanga mu by'ubuhinzi n'umwarimu w'amasomo ajyanye n'ubuhinzi. Nubwo umugore we ari umwe mu bayobozi bakomeye muri Afurika y'Iburasirazuba, Hafidh yakunze kurangwa no kutagaragara cyane mu ruhando rwa politiki no kubaho ubuzima butuje.

Yashakanye na Samia Suluhu Hassan mu mwaka wa 1978, bakaba bari bafitanye abana bane - abahungu batatu n'umukobwa umwe. Mu mwaka wa 2021, ubwo Samia Suluhu Hassan yageraga ku mwanya wa Perezida wa Tanzania, Hafidh yabaye First Gentleman wa mbere w'icyo gihugu.

Imihango yo kumushyingura Inzego za Tanzania zatangaje ko imyiteguro yo gushyingura Hafidh Ameir iri gukorwa i Kizimkazi, muri Zanzibar, ahakomoka umuryango we. Amakuru mashya yatangajwe n'ikinyamakuru The Citizen avuga ko umuhango wo kumushyingura uteganyijwe kuri uyu wa Mbere saa 16:00. Urupfu rwe rwakiriwe n'agahinda mu karere. Abayobozi batandukanye bo muri Afurika bamaze kugeza ubutumwa bwo kwihanganisha Perezida Samia n'umuryango we. Perezida wa Kenya, William Ruto, yavuze ko Samia yatakaje umugenzi w'ubuzima bwe, abana bakabura se bakundaga, naho Tanzania ikaba yatakaje umwana wayo w'ingenzi. Urupfu rwa Hafidh Ameir Hassan rubaye mu gihe Samia Suluhu Hassan akomeje kuyobora Tanzania muri manda ye ya kabiri. Rubavu Today ikomeje gukurikirana amakuru ajyanye n'umuhango wo kumushyingura ndetse n'ubutumwa bw'abayobozi bakomeje kwihanganisha Perezida Samia Suluhu Hassan n'umuryango we.