u Rwanda rwitabiriye Global Food Week na Global Food Security Summit bibera i Abu Dhabi

Felix Nyangezi · Ubukungu · 6 October 2026

U Rwanda rwitabiriye itangizwa rya Global Food Week 2026 na Global Food Security Summit, ibirori mpuzamahanga byibanda ku kwihaza mu biribwa, guteza imbere ubuhinzi burambye no gushakira hamwe ibisubizo by’ibibazo byugarije gahunda z’ibiribwa ku Isi.

Kuri uyu wa 6 Ukwakira 2026, Ambasaderi w’u Rwanda muri Leta Zunze Ubumwe z’Abarabu, John Mirenge, yifatanyije na Dr Patrick Karangwa, Umuyobozi Mukuru ushinzwe Guteza Imbere Ubuhinzi bugezweho muri Minisiteri y’Ubuhinzi n’Ubworozi (Rwanda Agriculture), hamwe n’abandi bagize itsinda ry’u Rwanda, mu itangizwa ry’ibi bikorwa bibera muri ADNEC Centre Abu Dhabi kuva ku itariki ya 6 kugeza ku ya 8 Ukwakira 2026.

Global Food Week ni urubuga ruhuza inzego za Leta, abashoramari, abahinzi, ibigo bikora mu ruhererekane rw’ibiribwa, abashakashatsi n’abahanga mu ikoranabuhanga. Iyi nshuro yayo ya 2026 ni yo nini kurusha izindi, ikaba ihuje abamurika n’ibigo 2,580 baturuka mu bihugu 92, mu gihe Global Food Security Summit yibanda ku gushimangira ubufatanye mpuzamahanga mu guhangana n’ibibazo by’umutekano w’ibiribwa.

Kwihaza mu biribwa no guhangana n’imihindagurikire y’ikirere

Inama ya Global Food Security Summit 2026 ifite insanganyamatsiko igira iti “Global Collaboration for Food Security for All”, ikaba igamije guhuza imbaraga mu guteza imbere gahunda z’ibiribwa zishobora guhangana n’ibibazo birimo imihindagurikire y’ikirere, ihungabana ry’uruhererekane rw’ibicuruzwa, izamuka ry’ibiciro ndetse n’ibibazo by’ubucuruzi mpuzamahanga.

Muri iyi nama kandi hazaganirwa ku ruhare rw’ikoranabuhanga, ubwenge buhangano (AI), ubuhinzi buhangana n’imihindagurikire y’ikirere, ishoramari, ubucuruzi n’imikoranire mpuzamahanga mu kubaka gahunda z’ibiribwa zirambye kandi zishobora guhangana n’ibibazo bishobora kuzivuka mu gihe kizaza.

Kuba u Rwanda rwitabiriye iyi nama ruhurizamo ibihugu n’inzego zitandukanye ku Isi biha igihugu umwanya wo gusangira ubunararibonye, kwagura imikoranire no gushaka amahirwe mashya mu buhinzi, ikoranabuhanga, ishoramari n’ubucuruzi bw’ibikomoka ku buhinzi.

Global Food Week na Global Food Security Summit bikomeje kuba urubuga rukomeye rwo guhuza abafata ibyemezo n’abakora mu nzego zitandukanye, mu gihe Isi ishaka uburyo bwo kubaka uburyo bw’ibiribwa burambye, butekanye kandi bushobora guhangana n’ibibazo by’igihe kizaza.