U Rwanda rwashyizeho Ambasade ya mbere mu Bwami bwa Espagne

Madrid, Espagne : Ku wa 2 Ukwakira 2026: Ambasaderi Christine Nkulikiyinka, uhagarariye Repubulika y’u Rwanda mu Bwami bwa Espagne, yashyikirije Minisiteri y’Ububanyi n’Amahanga, Umuryango w’Ubumwe bw’u Burayi n’Ubutwererane ya Espagne (Ministry of Foreign Affairs, European Union and Cooperation) kopi z’inyandiko zizwi nka Letters of Credence.

Letters of Credence ni inyandiko ya dipolomasi itangwa n’umukuru w’igihugu cyohereje Ambasaderi, ikemeza ko uwo Ambasaderi afite ububasha bwo guhagararira igihugu cye no gukora inshingano za dipolomasi mu gihugu yoherejwemo. Kuyishyikiriza ubuyobozi bw’igihugu yakoreyemo ni intambwe ikomeye igaragaza ko Ambasaderi atangiye ku mugaragaro inshingano ze.

Iki gikorwa gifite umwihariko kuko cyabaye mu gihe u Rwanda rwatangiye ku mugaragaro ubutumwa bwa mbere bwa dipolomasi buhoraho muri Espagne, bufite icyicaro i Madrid.

Iri Ambasade rizafasha u Rwanda na Espagne kurushaho guteza imbere umubano wa dipolomasi, ubucuruzi n’ishoramari, ubukerarugendo, uburezi n’ubushakashatsi, ndetse n’ubutwererane mu nzego zitandukanye.

Kuba u Rwanda rufite ubutumwa bwa dipolomasi i Madrid bizanatuma habaho uburyo buhoraho bwo guhuza Guverinoma y’u Rwanda n’inzego za Espagne, ndetse no korohereza Abanyarwanda baba muri Espagne kubona serivisi za konsula n’izindi serivisi zijyanye n’inshingano za Ambasade.

Iki gikorwa rero ni intambwe nshya mu gushimangira no kwagura umubano hagati y’u Rwanda n’Ubwami bwa Espagne, mu gihe ibihugu byombi bikomeje gushaka amahirwe mashya y’ubufatanye n’inyungu zihuriweho.