Rubavu: Hateraniye inama ku mushinga wa Gisenyi City Tour no gushyiraho Rubavu Visitor Center

Ku wa Gatatu, Visi Meya w’Akarere ka Rubavu ushinzwe Iterambere ry’Ubukungu, Deogratias Nzabonimpa, yayoboye inama yahuje abafatanyabikorwa batandukanye, baganira ku ishyirwa mu bikorwa ry’umushinga wa Gisenyi City Tour no gushyiraho Rubavu Visitor Center. Iyi nama yibanze ku kurebera hamwe igitekerezo cy’umushinga, uburyo uzashyirwa mu bikorwa ndetse n’inzira z’ibikorwa by’ubukerarugendo zizajya zinyurwamo muri Gisenyi. Abitabiriye kandi baganiriye ku nshingano za buri mufatanyabikorwa, uburyo bwo gukorana no gushaka amikoro azafasha mu gushyira uyu mushinga mu bikorwa. Umushinga wa Gisenyi City Tour ugamije guteza imbere ubukerarugendo mu Mujyi wa Gisenyi, binyuze mu guha abashyitsi amahirwe yo gusura ahantu nyaburanga hatandukanye no kumenya byinshi ku mateka, umuco, ibiranga uyu mujyi ndetse n’ibikorwa by’ubukerarugendo biboneka hirya no hino mu Karere ka Rubavu. Ku rundi ruhande, Rubavu Visitor Center izaba ahantu abashyitsi bashobora kubona amakuru abafasha kumenya ahantu nyaburanga basura, ibikorwa by’ubukerarugendo bihari ndetse n’andi makuru ajyanye n’Akarere ka Rubavu. Ubuyobozi bw’Akarere n’abafatanyabikorwa bitezweho gukomeza gukorana mu gushyira uyu mushinga mu bikorwa, hagamijwe kongera ibikorwa by’ubukerarugendo, guteza imbere ubukungu bw’Akarere no guha abashyitsi serivisi n’amakuru aboneye ku byo bashobora gusura no kwishimira muri Rubavu.