Rubavu: Bethlehem Choir yeretswe urukundo rwinshi mu gitaramo yakoreye kuri ADEPR Rugerero

Abakunzi b'umuziki uhimbaza Imana bahuriye ku Itorero ADEPR Rugerero ku wa 20 Nzeri 2026, mu gitaramo cyateguwe na Korali Abategereje, aho Bethlehem Choir yo ku Gisenyi yari umushyitsi mukuru. Iki gitaramo cyahuje amakorali atandukanye, barimo Korali Ababibyi, Korali Himbaza na Korali Nyundo, zose zibumbiye muri ADEPR Rugerero, mu gihe Bethlehem Choir yari yatumiwe kugira uruhare rwihariye muri iki gikorwa cy'ivugabutumwa. Igikorwa cyatangiye ku gicamunsi, aho abitabiriye bahawe umwanya wo kuramya no guhimbaza Imana binyuze mu ndirimbo, ndetse hakaba n'inyigisho y'Ijambo ry'Imana. Bethlehem Choir yagaragaje ubutumwa binyuze mu ndirimbo Nyuma y'uko amakorali yari yatangiye igitaramo aririmba, Bethlehem Choir na yo yafashe umwanya wayo, itanga ubutumwa binyuze mu ndirimbo zimwe mu zakunzwe n'abakunzi bayo. Muri izo ndirimbo harimo "Birashoboka," "Imbaraga mu Maraso ya Yesu," "Dukundane," "Tuzigumira muri Yesu," "Hari Ibanga ku Bakijijwe," "Yesu We!" ndetse na "Ku Zajya mu Ijuru."

Bethlehem Choir ni imwe mu makorali amaze igihe mu murimo wo kuririmba no kugeza ubutumwa bwa Yesu Kristo ku bantu, by'umwihariko binyuze mu ndirimbo za Gospel. Muri icyo gitaramo hanatanzwe inyigisho y'Ijambo ry'Imana na Pastor Seraphin wo mu Itorero rya Gisenyi wari waherekeje Bethlehem Choir. Yifashishije imirongo yo mu Baroma 10:11 ndetse no muri Yohana 2:1-11, aho havugwa igitangaza Yesu yakoze mu bukwe bw'i Kana. Muri iyo nyigisho, yibanze ku kwizera Kristo no ku busobanuro bw'"isoni" zivugwa muri uwo murongo, asobanura ko ku muntu wizera Kristo bitagomba kuba ikibazo cyo kubura icyemezo afata mu buzima bwe bw'umwuka. Abakuriye muri Bethlehem Choir na bo bari bahari Iki gitaramo kandi cyagaragayemo bamwe mu bantu bafite amateka muri Bethlehem Choir, barimo Pastor Maniriho Benite, umaze imyaka 17 aririmba muri iyi korali mbere yo kujya mu murimo w'ubupasiteri. Hari kandi Pastor Prince Mutabazi ndetse na Uwimana Jean Claude, na bo bafite amateka yo kuba barabaye muri Bethlehem Choir. Ibi byongeye guha igitaramo umwihariko, kuko cyabaye umwanya wo kongera guhuriza hamwe bamwe mu banyamuryango n'abahoze muri iyi korali. Mu gusoza, Umuyobozi wa Bethlehem Choir, Prince Mahoro, yashimiye Korali Abategereje ndetse n'abayobozi b'Itorero ADEPR Rugerero ku buryo bakiriye iyi korali. Yagaragaje ko Bethlehem Choir yishimiye ubutumire ndetse ashimangira ko bashobora kongera gusubira i Rugerero mu bindi bikorwa. Bethlehem Choir kandi iherutse gushyira hanze indirimbo nshya yitwa "Yesu Gusa (Yesu ni we Muhuza)", yasohotse ku wa 21 Kanama 2026, ikaba yubakiye ku butumwa bwo muri Yohana 14:6 buvuga kuri Yesu nk'inzira, ukuri n'ubugingo. Igitaramo cya Rugerero cyongeye kugaragaza uruhare rw'amakorali mu kugeza ubutumwa bw'Ijambo ry'Imana ku bantu, aho umuziki wifashishwa nk'uburyo bwo kuramya, guhimbaza no gukomeza kwizera.