Rubavu: Abayobozi bahuguwe ku buringanire n’imiyoborere idaheza

Kuri uyu wa Gatatu, Pro-Femmes Twese Hamwe, ku bufatanye n’Akarere ka Rubavu, hasoje amahugurwa y’iminsi ibiri yari agamije kongerera abayobozi bo mu nzego z’ibanze ubushobozi mu bijyanye n’uburinganire n’imiyoborere idaheza, muri gahunda ya SERVE Project ishyirwa mu bikorwa na Pro-Femmes Twese Hamwe. Aya mahugurwa yari agamije gufasha abayobozi kurushaho kugira ubumenyi n’ubushobozi bwo gutanga serivisi zita ku buringanire kandi zigera kuri bose, hatitawe ku gitsina cyangwa ku zindi nzitizi zishobora gutuma bamwe basigara inyuma. Abitabiriye kandi bungutse ubumenyi ku buryo bwo gushyiriraho urubyiruko, cyane cyane abakobwa bakiri bato, amahirwe yo kwitabira no kungukira mu ruhererekane nyongeragaciro rw’ubuhinzi. Abategura aya mahugurwa bavuga ko kongerera abayobozi ubushobozi muri ibi bijyanye ari ingenzi mu guteza imbere imiyoborere ishingiye ku buringanire, no gufasha urubyiruko kugira uruhare rugaragara mu bikorwa by’ubukungu, by’umwihariko mu rwego rw’ubuhinzi. Amahugurwa yasojwe nyuma y’iminsi ibiri y’ibiganiro n’imyitozo byibandaga ku buryo abayobozi bashobora gushyira mu bikorwa ihame ry’uburinganire, guteza imbere serivisi zidaheza no gufasha urubyiruko kubona amahirwe yo kwiteza imbere.