Perezida wa Benin Romuald Wadagni yagiriye uruzinduko mu Rwanda

Urwo ruzinduko rugamije guteza imbere ubufatanye Uruzinduko rwa Perezida Wadagni mu Rwanda rugamije gukomeza umubano n’ubufatanye hagati y’ibihugu byombi, by’umwihariko mu nzego zirimo umutekano, ubucuruzi n’ishoramari, ubwikorezi, ubukerarugendo ndetse n’ikoranabuhanga mu itumanaho.

Ku wa Kane, Perezida Wadagni yakiriwe ku Biro bya Perezida w’u Rwanda i Kigali, aho yagenzuye abarinzi b’icyubahiro mbere yo kugirana ibiganiro byihariye na Perezida Kagame ku mubano n’ubufatanye hagati y’u Rwanda na Benin.

Umubano w’ibihugu byombi watangiye gukomera U Rwanda na Benin byakomeje guteza imbere umubano w’ibihugu byombi mu myaka ishize. Mu 2023, Perezida Kagame yagiriye uruzinduko rwa Leta muri Benin, aho yagiranye ibiganiro na Perezida w’icyo gihe Patrice Talon. Muri urwo ruzinduko, ibihugu byombi byasinyanye amasezerano icyenda y’ubufatanye mu nzego zitandukanye, zirimo ubuhinzi, ikoranabuhanga, imiyoborere y’inzego z’ibanze, iterambere rirambye, ubufatanye mu bya gisirikare, ubucuruzi n’inganda, ubukerarugendo ndetse no guteza imbere ishoramari. Icyo gihe kandi impande zombi zaganiriye ku mutekano, harimo n’iterabwoba ryari rikomeje kugaragara mu karere ka Sahel no kwaguka kwaryo mu bihugu byo ku nkengero z’Afurika y’Iburengerazuba.

Mbere yo kuba Perezida wa Benin, Romuald Wadagni yari Minisitiri w’Ubukungu n’Imari muri icyo gihugu. Mu 2023, na we yari yarasuye u Rwanda nka intumwa idasanzwe ya Perezida Patrice Talon, azanira Perezida Kagame ubutumwa bw’umukuru w’igihugu cye. Muri uwo mwaka kandi u Rwanda na Benin byashyize umukono ku masezerano y’ubufatanye mu mutekano no mu bya gisirikare.

Mu ruzinduko Perezida Kagame yagiriye muri Benin mu 2023, yasuye ikigo cya Sèmè City, cyashyiriweho guteza imbere ubumenyi, ubushakashatsi, udushya n’imishinga y’urubyiruko. Perezida Kagame yagiranye kandi ibiganiro n’urubyiruko rugizwe n’abikorera, abanyeshuri ndetse n’abayobozi b’ibigo bitangiza imishinga, hibandwa ku ruhare rw’urubyiruko mu iterambere ry’Afurika. U Rwanda na Benin kandi byagaragaje ko bishaka kurushaho gukorana mu nzego zirimo ikoranabuhanga, ubucuruzi, ishoramari n’ubuhinzi.

Mu gihe cy’uruzinduko rwe rw’iminsi ibiri mu Rwanda, Perezida Romuald Wadagni ateganyijwe gusura Kigali Genocide Memorial i Gisozi ndetse n’ahandi hantu hatandukanye. Uru ruzinduko rubaye mu gihe ibihugu byombi bikomeje gushimangira ubufatanye mu nzego zitandukanye, hashingiwe ku masezerano n’imikoranire byagiye bishyirwaho mu myaka ishize.