Perezida Trump yasezeranyije buri munyamerika Miliyoni 7 Frw Abarepubulikani nibatsinda amatora
Perezida wa Leta Zunze Ubumwe za Amerika, Donald Trump, yatangaje ko ashaka guha buri Munyamerika ukuze amadolari 5.000 arenga Miliyoni 7 z'amafaranga y'u Rwanda, mu gihe ishyaka ry'Abarepubulikani ryakomeza kugumana ubwiganze mu Nteko Ishinga Amategeko nyuma y’amatora ateganyijwe mu Ugushyingo. Trump yabivugiye mu nama idasanzwe y’Abarepubulikani yabereye i Dallas muri Texas, mu gihe hasigaye igihe gito ngo Abanyamerika bajye mu matora ateganyijwe ku wa 3 Ugushyingo 2026. Yavuze ko ayo mafaranga azitwa “Trump Dividend”, cyangwa inyungu yahawe abaturage, ndetse avuga ko azayaha buri muntu mukuru mu gihe Abarepubulikani batsinze Inteko Ishinga Amategeko umutwe w’Abadepite ndetse na Sena. Trump yagize ati: “Niba Abarepubulikani batsinze Inteko Ishinga Amategeko na Sena, nzatanga inyungu ya $5,000 kuri buri Munyamerika ukuze.” Amafaranga arenga miliyari 1.3 z’amadolari Reuters ivuga ko Leta Zunze Ubumwe za Amerika ifite abantu bakuru bagera kuri miliyoni 270, bivuze ko iyi gahunda ishobora gutwara hafi miliyari 1.35 z’amadolari. Nubwo Trump yatanze iri sezerano, haracyari ibibazo ku buryo ryashyirwa mu bikorwa ndetse n’uko ryakubahirizwa mu mategeko. Iri sezerano ryatanzwe mu gihe Trump n’Abarepubulikani bashaka kongera imbaraga mu kwiyamamariza amatora yo hagati y’igihe, aho ishyaka rishaka kugumana ubuyobozi mu mitwe yombi y’Inteko Ishinga Amategeko. Inama yabereye i Dallas ni iya mbere y’Abarepubulikani yibanze ku matora yo hagati y’igihe. Iyi nama igamije kongera imbaraga mu bashyigikiye ishyaka no gufasha abakandida baryo kwitegura amatora. Trump ni we wari umuntu mukuru wagarutsweho cyane muri iyi nama. Yanasabye Abanyamerika gufata aya matora nk’aho na we ubwe ari umukandida uri ku rupapuro rw’amatora, agaragaza ko intsinzi y’Abarepubulikani ari ingenzi ku miyoborere ye Umuyobozi wa Komite y’Igihugu y’Abarepubulikani, Joe Gruters, ndetse yasobanuye iyi nama mu buryo bwo kuyihuza na Trump, ayita “Trumpapalooza.” Abarepubulikani bafite impungenge Nubwo Trump yashyize imbere iri sezerano, hari Abarepubulikani bamwe batitabiriye iyi nama, cyane cyane abakandida bahanganye bikomeye n’Abademokarate mu matora ateganyijwe. Bamwe batinya ko kuba ishyaka ryibanda cyane kuri Trump bishobora kubagora kwigarurira amajwi y’abatamushyigikiye, mu gihe ubushakashatsi bw’amatora bwerekana ko Trump afite ibibazo by’icyizere mu baturage. Muri iyi nama, Abarepubulikani banakomeje kunenga Abademokarate, babashinja gukabya mu bitekerezo bya politiki. Ibibazo abaturage bakunze kuvuga ko bibahangayikishije, birimo izamuka ry’ibiciro ndetse n’intambara ya Iran, byo byahawe umwanya muto ugereranyije. Umwuka wa politiki ukomeje gukomera Amatora yo ku wa 3 Ugushyingo 2026 afite akamaro gakomeye ku mashyaka yombi. Abarepubulikani bafite intego yo gukomeza kuyobora Inteko Ishinga Amategeko, mu gihe Abademokarate bashaka kwigarurira nibura umwe mu mitwe yayo. Muri uyu mwanya, Trump aragerageza gukoresha izina rye n’abamushyigikiye kugira ngo afashe Abarepubulikani gutsinda. Isezerano rya $5,000 kuri buri Munyamerika mukuru ni kimwe mu byashyizwe imbere mu rwego rwo gukurura abatora no kubasaba gushyigikira ishyaka rye.