Perezida Ndayishimiye yerekeje mu Misiri aho agiye kuyobora inama ikomeye ihuza Afurika
Perezida w’u Burundi akaba na Perezida uriho w’Umuryango wa Afurika Yunze Ubumwe (AU), Évariste Ndayishimiye, yerekeje mu Misiri aho azagira uruhare rukomeye mu nama zihuza abayobozi bakuru ba Afurika, zirimo iyo azayobora ku wa 4 Ukwakira 2026.
Kuri uyu wa Gatanu tariki ya 2 Ukwakira 2026, Perezida Ndayishimiye yafashe indege imwerekeza i New Alamein, mu Misiri, aho hateganyijwe uruhurirane rw’inama zikomeye z’Afurika ruzamara iminsi itatu, kuva ku wa 2 kugeza ku wa 4 Ukwakira.
Muri uru ruzinduko, Ndayishimiye azayobora Inama ya 8 y’Umwaka hagati y’Umuryango wa Afurika Yunze Ubumwe n’Imiryango y’Ubukungu y’Uturere (RECs), izaba ku wa 4 Ukwakira 2026 i New Alamein. Umuryango wa Afurika Yunze Ubumwe wemeje ko iyi nama izaba ari ku wa 4 Ukwakira, kuva saa 09:30 kugeza saa 18:30.
Iyi nama izahuza abayobozi b’ibihugu na za Guverinoma, abayobozi b’Imiryango y’Ubukungu y’Uturere ndetse n’abahagarariye inzego zitandukanye, hagamijwe guhuza gahunda n’imikoranire hagati ya AU n’inzego z’uturere mu guteza imbere gahunda z’ubukungu n’iterambere rya Afurika.
Ku wa 3 Ukwakira hazaba indi nama ikomeye
Mbere y’iyi nama ya AU, ku wa 3 Ukwakira, Perezida Ndayishimiye azitabira inama y’ibihugu byashinze AUDA-NEPAD, izibanda ku buryo bwo kwihutisha iterambere ry’ubukungu n’imibereho myiza muri Afurika ndetse no gushaka uburyo bwo kubona inkunga n’ishoramari bikenewe mu mishinga y’iterambere ry’umugabane.
AUDA-NEPAD ni urwego rukomeye mu gushyigikira gahunda z’iterambere rya Afurika, cyane cyane mu bikorwa remezo, ubucuruzi, ishoramari, guhanga imirimo n’iterambere rirambye.
New Alamein ihindutse ihuriro ry’abayobozi ba Afurika
Kuva ku wa 2 kugeza ku wa 4 Ukwakira, New Alamein izakira ibikorwa bitandukanye birimo Alamein Africa Forum, inama y’ibihugu byashinze AUDA-NEPAD ndetse n’Inama ya 8 ya AU Mid-Year Coordination Meeting.
Muri ibyo biganiro hazibandwa ku ngingo zirimo kwihutisha ishyirwa mu bikorwa ry’Isoko Rusange rya Afurika (AfCFTA), kongera ubucuruzi hagati y’ibihugu bya Afurika, gushaka inkunga y’imishinga y’iterambere, guteza imbere ibikorwa remezo ndetse no guhuza gahunda z’iterambere n’umutekano.
Kuri Perezida Ndayishimiye, uru ruzinduko ruje mu gihe afite inshingano zo kuyobora Umuryango wa Afurika Yunze Ubumwe, bityo inama azayobora ikaba ari umwanya wo guhuza ibitekerezo by’ibihugu bya Afurika n’Imiryango y’Ubukungu y’Uturere mu bijyanye no kwihutisha gahunda z’umugabane.
Inama ya 4 Ukwakira ni yo izaba isonga muri uru rugendo, kuko ari yo izahuza ku rwego rwo hejuru AU n’Imiryango y’Ubukungu y’Uturere, mu biganiro bigamije guteza imbere ubufatanye n’ihuzwa rya gahunda za Afurika.