Papa Sava azanye Film nshya kuri Zacu TV yise "Ibishoboka Byose".

Papa Sava, yatangaje ko filime ye nshya yise “Ibishoboka Byose” izatangira kunyura kuri Zacu TV ku wa Mbere, tariki ya 5 Ukwakira 2026. Ibi yabigarutseho mu kiganiro “Samedi Détente” cya Radio Rwanda, mu ijoro ryo ku wa Gatandatu, tariki ya 3 Ukwakira, rishyira ku Cyumweru, tariki ya 4 Ukwakira 2026.

Papa Sava yagize ati “Ibishoboka Byose izasohoka tariki 5 z’uku kwa Cumi, ni ukuvuga umusibo ejo. Ni ku wa Mbere izasohoka, ijye ica kuri Zacu TV. Ni kuri shene ya gatatu kuri CANAL+, Saa Moya z’umugoroba. Igarukaho Saa Tatu [z’umugoroba]”. Iyi filime yayobowe na Director Kenny, usanzwe akorana na Papa Sava mu mishinga itandukanye. Papa Sava, uherutse kwizihiza imyaka 30 amaze mu buhanzi, yasobanuye ko buri munsi, guhera ku wa Mbere kugeza ku wa Gatanu, hazajya herekanwa igice gishya cy’iyi filime saa moya z’umugoroba, cyongere kwerekanwa saa tatu z’umugoroba.

Mu mpera z’icyumweru, ibice byatambutse muri icyo cyumweru bizajya byerekanwa bikurikirane. Ku bijyanye no kuyirebera kuri YouTube, Papa Sava yavuze ko ubwo buryo buhari gusa ku bari hanze ya Afurika. Ati “Utari muri Afurika uba ushobora kuzibona. Ubwo hari impamvu babikoze bijyanye no kugira ngo shene imenyekane; ubucuruzi, ibyo bumvikanye hejuru aho, ntajyamo njyewe”. Mu bakinnyi bazagaragara muri “Ibishoboka Byose” harimo Papa Sava, ari na we nyirayo, Nyabitanga, Saranda, Madudu n’abandi.

Iyi filime ikurikiye “What a Day” Papa Sava yasohoye mu ntangiriro za 2026, igakundwa n’abatari bake. Biteganyijwe kandi ko “What a Day” izerekanwa mu iserukiramuco rya Silicon Valley African Film Festival