NIDA yasubitse by’agateganyo gahunda yo gufotora no kwemeza e-Ndangamuntu

Rubavu Today

Ikigo cy’Igihugu gishinzwe Indangamuntu (NIDA) cyatangaje ko gahunda yo gufotora abaturage no kwemeza amakuru yabo hagamijwe gutanga indangamuntu z’ikoranabuhanga (e-Ndangamuntu) yasubitswe by’agateganyo.

Mu itangazo ryacyo, NIDA yamenyesheje abaturage ko gahunda y’ibikorwa byo gufotora no kwemeza indangamuntu mu Mirenge itandukanye yahagaritswe by’agateganyo, mu gihe hategerejwe ko hamenyekana gahunda nshya n’aho ibyo bikorwa bizabera.

NIDA yavuze ko amakuru ajyanye n’amatariki n’aho ibikorwa bizakorerwa azamenyeshwa abaturage mu minsi iri imbere, bityo ikaba isaba abaturage gukomeza gukurikira amatangazo azajya atangwa ku mugaragaro.

Nubwo ibikorwa byo gufotora no kwemeza indangamuntu byasubitswe by’agateganyo, gutanga no kwemeza amakuru y’ibanze (pre-enrollment) biracyakomeje binyuze ku rubuga rwa Irembo.

Ibi bivuze ko abaturage bashaka gutanga cyangwa kwemeza amakuru yabo ajyanye n’ikorwa ry’indangamuntu z’ikoranabuhanga bashobora gukomeza gukoresha urubuga rwa Irembo, mu gihe bategereje andi mabwiriza ajyanye n’ibikorwa byo gufotora no kwemeza amakuru imbonankubone.

Abaturage barasabwa gukurikirana amakuru atangwa na NIDA kugira ngo bamenye igihe n’aho bazatangirira cyangwa bakomereza izindi ntambwe zisigaye muri iyi gahunda.