Mikel Arteta yongereye amasezerano muri Arsenal kugeza mu 2030

Umutoza wa Arsenal, Umunya-Espanye Mikel Arteta uherutse gutwara igikombe cya shampiyona, yongereye amasezerano muri iyi kipe kugeza mu 2030, avuga ko ibyo iyi kipe imaze kugeraho ari intangiriro y’ibindi byinshi ishaka kugeraho. Uyu Munya-Espagne w’imyaka 44 yari asigaje amasezerano azarangira mu mpera z’uyu mwaka w’imikino, ariko Arsenal yamaze kumwongerera amasezerano azatuma ashobora kumara imyaka igera ku 10 ayitoza. Arteta yageze muri Arsenal mu Ukuboza 2019, ahabwa inshingano zo guhindura ikipe yari imaze igihe idahatanira ibikombe bikomeye. Arteta yavuze ko yishimiye gukomeza urugendo rwe muri Arsenal, ashimangira ko afitanye umubano wihariye n’iyi kipe. Yagize ati: “Iyi kipe irihariye, imiterere yayo n’uburyo ituma wumva umeze. Numva mfite amahirwe akomeye kuba urugendo rwacu ruzakomeza.” Yakomeje ati: “Tumaze kubaka umubano udasanzwe kandi twagize ibihe bizahora mu mateka yacu. Ikidushimishije cyane ni uko ibyo dushobora kugeraho hamwe ari intangiriro gusa.” Amasezerano mashya ya Arteta yanongereye amafaranga ahembwa, kuko mbere yahembwaga miliyoni 10 z’ama pound ku mwaka, hakiyongeraho miliyoni 5 zishobora kuboneka mu bihembo bitewe n’umusaruro w’ikipe. Ibi bivuze ko umushahara we ushobora kugera kuri miliyoni 15 z’ama pound ku mwaka. Mbere y’uko Arsenal yongerera Arteta amasezerano, byavugwaga ko uyu mutoza yagereranyaga agaciro ke n’abatoza nka Diego Simeone wa Atlético Madrid na Pep Guardiola wahoze atoza Manchester City, bombi bavugwa ko bahembwaga amafaranga arenga miliyoni 20 ku mwaka. Mu myaka amaze muri Arsenal, Arteta yayifashije kwegukana igikombe cya Premier League ndetse na FA Cup. Arsenal kandi yageze ku mukino wa nyuma wa Champions League muri Gicurasi, ariko itsindwa na Paris Saint-Germain. Nubwo gutsindwa uwo mukino byababaje Arsenal, ubuyobozi bw’iyi kipe bubona ko umushinga Arteta yatangiye ukomeje gutanga umusaruro. Arsenal kandi yegukanye igikombe cya Premier League ku nshuro ya mbere mu myaka 20 ishize mu mwaka ushize w’imikino. Ba nyiri Arsenal, Stan na Josh Kroenke, bavuze ko bishimiye gukomeza gukorana na Arteta. Bagize bati: “Dufitanye umubano udasanzwe na Mikel. Twishimiye cyane ibyo tumaze kugeraho kuva yagaruka muri iyi kipe mu 2019.”