Ku wa 1 Ukwakira: imyaka 36 y’urugendo rwo kubaka u Rwanda rushya

Ku wa 1 Ukwakira 1990, ni bwo RPF-Inkotanyi yatangiye urugamba rwo kubohora u Rwanda. Nyuma y’imyaka 36, uyu munsi ukomeje kuba umwanya wo kuzirikana ubutwari bw’abarwitangiye, gushimira abarukomeje no gutekereza ku nshingano z’ab’iki gihe mu kubaka u Rwanda.

Uyu munsi, 1 Ukwakira 2026, ni imyaka 36 ishize urugamba rwo kubohora u Rwanda rutangiye. Ni umunsi ufite igisobanuro gikomeye mu mateka y’igihugu, ariko kandi ukwiye kuba umwanya wo kureba aho u Rwanda rugeze n’icyo Abanyarwanda bakwiye gukora kugira ngo ibyiza byagezweho bikomeze kuramba.

Ku wa 1 Ukwakira 1990, RPF-Inkotanyi yatangije urugamba rwo kubohora igihugu, ruyobowe mu ntangiriro na Maj Gen Fred Gisa Rwigema. Rwigema yaguye ku rugamba ku wa 2 Ukwakira 1990, umunsi umwe nyuma y’itangizwa ry’urugamba.

Uyu munsi, iyo u Rwanda rwibuka uwo munsi, ntirwibuka gusa intambara yo mu myaka yashize. Ni n’umwanya wo kwibuka ubwitange, kwigomwa, gukunda igihugu no kwemera gutanga byinshi ku bw’ejo hazaza harwo.

Amateka asigira iki ab’uyu munsi?

Nyuma y’imyaka 36, ubutumwa bukomeye uyu munsi ushobora gusigira urubyiruko ni uko igihugu kitubakwa n’umuntu umwe cyangwa igisekuru kimwe.

Abanyarwanda bafite inshingano zo gukomeza kubaka igihugu kirangwa n’umutekano, ubumwe, gukorera hamwe, gukora cyane no guha agaciro ubuzima bwa muntu.

Guverinoma y’u Rwanda ivuga ko indangagaciro zirimo ubumwe, gukunda igihugu, imibereho myiza y’abaturage, kwihangana no gukora cyane ari zimwe mu ndangagaciro z’ingenzi ziranga Abanyarwanda.

Kuri uyu munsi rero, ubutumwa bwo kwibohora ntibukwiye kurangirira mu kwibuka ibyabaye. Bukwiye no kuba umuhigo wo gukomeza gukora.

Turashimira RPF-Inkotanyi n’ubuyobozi bwayo

Uyu munsi ni umwanya wo gushimira RPF-Inkotanyi ku rugendo rwayo rw’amateka, ndetse no gushimira Nyakubahwa Paul Kagame, Perezida wa Repubulika y’u Rwanda, wayoboye ingabo za RPF mu rugamba rwo kubohora igihugu kuva mu 1990, nk’uko amateka ya Leta y’u Rwanda abigaragaza.

Ni muri iyo mvugo kandi twavuga tuti:

Intore izirusha intambwe, Nyakubahwa Paul Kagame, turagushimira.

Turashimira kandi abagize uruhare mu rugamba rwo kubohora igihugu, yaba abarwitangiye ubuzima bwabo, abarukomerekeyemo bagakuramo ubumuga budakira , abarushyigikiye ndetse n’imiryango y’abaruburiyemo ababo.

Ntidukwiye kwibagirwa Intwari z’u Rwanda

Kuri uyu munsi kandi, ni ngombwa kunamira no gushimira Intwari z’u Rwanda zose, zashyizwe mu byiciro bitatu: Imanzi, Imena n’Ingenzi.

Imanzi ni icyiciro cy’Intwari zagaragaje ubutwari buhambaye kandi zikagira igitambo gikomeye. Muri iki cyiciro harimo Maj Gen Fred Gisa Rwigema, ndetse n’umusirikare utazwi, uhagarariye abasirikare baguye ku rugamba rwo kubohora igihugu n’abandi bazatanga ubuzima bwabo barengera ubusugire bw’igihugu.

Imena ni Intwari zagaragaje ibikorwa bidasanzwe birangwa n’igitambo, akamaro gakomeye n’urugero rwiza. Iki cyiciro kirimo amazina nka Mutara III Rudahigwa, Michel Rwagasana, Agathe Uwilingiyimana, Félicité Niyitegeka n’abanyeshuri b’Inyange.

Ingenzi ni Intwari zikiriho, zizwiho ibikorwa cyangwa ibitekerezo by’indashyikirwa birangwa no kwigomwa, akamaro gakomeye n’urugero rwiza.

Kuri bo bose, ubutumwa ni bumwe:

Turabashimira. Turabazirikana. Turububaha.

Ubutumwa bw’uyu munsi

Ku rubyiruko rw’u Rwanda, 1 Ukwakira ikwiye kuba umunsi wo kwibaza uti: “Ni iki nanjye nakora kugira ngo igihugu cyanjye kirusheho gutera imbere?”

Kwibohora kw’uyu munsi ntibisaba buri wese gufata intwaro. Bisaba umunyeshuri kwiga neza, umukozi gukora neza, umucuruzi gukorera mu mucyo, umuyobozi gukorera abaturage, umubyeyi kurera neza abana, umunyamakuru kuvuga ukuri no kubaha umwuga we, ndetse n’umunyarwanda wese kugira uruhare mu kubaka igihugu.

Igihugu cyubakwa n’abagituye ntabwo cyubakwa n’abatuye hanze yacyo.

Uyu munsi kandi twibuke ko amahoro atari ikintu umuntu agomba gufata nk’aho gisanzwe. Ni umurage usaba kurindwa, gukomezwa no guhererekanywa kuva ku gisekuruza kujya ku kindi.

Ku wa 1 Ukwakira 2026, turibuka abatanze ubuzima bwabo, dushimira abagejeje u Rwanda aho rugeze, kandi tureba imbere.

Turashimira RPF-Inkotanyi. Turashimira Intwari z’u Rwanda. Turashimira abarwanye kandi bakomeje gukorera igihugu. Turashimira Nyakubahwa Paul Kagame, Intore izirusha intambwe.

Kandi ubutumwa bukomeye bw’uyu munsi ni ubu:

U Rwanda twarazwe ni rwo tugomba kurinda, kandi u Rwanda rw’ejo ni rwo tugomba kubaka.

Ku bw’u Rwanda, ku bw’Abanyarwanda, ku bw’ejo hazaza hacu n’u Rwanda Muri Rusange kandi tukabikora nk’umwihariko wacu.