Kenya: Habonetse umurwayi wa mbere wa Ebola

Kuri uyu wa mbere tariki ya 06 Ukwakira 2026, Kenya yemeje ko yabonetsemo umurwayi wa mbere wa Ebola, akaba ari umuntu wari umaze imyaka irindwi aba kandi akorera muri Repubulika Iharanira Demokarasi ya Congo (DRC), mbere yo gutaha muri Kenya anyuze muri Uganda. Minisiteri y’Ubuzima muri Kenya yatangaje kuri uyu wa Kabiri ko uwo murwayi yapfuye mu ijoro ryo ku wa Mbere, ari kuvurirwa mu bitaro byo mu murwa mukuru Nairobi. Nk’uko tubikesha ikinyamakuru BBC Gahuzamiryango, Minisitiri w’Ubuzima muri Kenya, Aden Duale, yavuze ko uwo muntu yari amaze imyaka irindwi aba kandi akorera muri DRC. Yafashwe n’indwara mu kwezi gushize, atangira kuvurirwa mu bitaro bitandukanye byo muri Congo mbere yo kujya muri Uganda, aho yavuye agaruka muri Kenya. Uyu murwayi yageze ku Kibuga cy’Indege Mpuzamahanga cya Jomo Kenyatta ku wa Gatandatu, ari mu ndege ya Jambojet yari itwaye abagenzi 23. Nyuma yo kugera muri Kenya, abo mu muryango we bahise bamujyana mu bitaro byo muri Nairobi, aho yashyizwe mu kato kugira ngo atagira abo yanduza. Ibizamini byakorewe muri Laboratwari y’Igihugu ya Kenya ndetse no muri Kenya Medical Research Institute (KEMRI) byemeje ko yari arwaye Ebola. Nyuma yo kwemeza ko uwo murwayi yari afite Ebola, inzego z’ubuzima zatangiye gukurikirana abantu bashobora kuba barahuye na we. Kugeza ubu, Minisiteri y’Ubuzima ivuga ko imaze kumenya abantu 28 bahuye n’uwo murwayi, barimo abo mu muryango we ndetse n’abaganga bamwitayeho. Abashinzwe ubuzima kandi barimo gushakisha abandi bantu bari muri iyo ndege, barimo abagenzi 23 ndetse n’abakozi bane, kugira ngo bamenye niba hari ushobora kuba yarahuye n’uyu murwayi. Izi nzego ziri gukurikirana abo bantu no kubasuzuma mu rwego rwo gukumira ko Ebola yakwirakwira mu gihugu.