Kate Bashabe wabaye Miss MTN yujuje imyaka 36 y’amavuko

Bashabe Catherine, uzwi cyane nka Kate Bashabe, yujuje imyaka 36 y’amavuko, aboneraho umwanya wo kwizihiza ubuzima bwe no gushimira Imana ku rugendo amaze kunyuramo. Kate Bashabe ni umwe mu bagore b’Abanyarwanda bamaze igihe bazwi cyane mu myidagaduro, imideli n’ubucuruzi. Yamenyekanye cyane nyuma yo kwegukana ikamba rya Miss MTN mu 2010, aho yanabaye ambasaderi wa MTN Rwanda, mbere yo kwegukana ikamba rya Miss Nyarugenge mu 2012. Uyu munyamideli akaba na rwiyemezamirimo yakomeje kwagura ibikorwa bye, by’umwihariko mu bijyanye n’imideli n’ubucuruzi. Ni na we washinze Kabash Fashion House, ndetse akaba azwi mu bikorwa by’ubugiraneza binyuze muri Kabash Cares, umushinga yagiye akoresha mu gufasha abana n’abagore batishoboye nk'uko bitangazwa na The New Times. Yizihije isabukuru mu byishimo Mu kwizihiza imyaka 36, Kate Bashabe yagaragaje ko yishimiye uyu munsi wihariye. Yagaragaje amashusho y’ibihe byo kwizihiza isabukuru ye, aho yabanje kuzimya buji, nyuma agaragara arimo kurya burger. Mu butumwa yaherekeje amashusho, Kate yavuze ko ari utuntu duto duto tumushimisha, atanga urugero rwo kurya burger ku munsi w’isabukuru ye. Yongeyeho ko ashimira Imana kuba yaragiye imurinda kandi ikamugeza kuri uyu munsi. Yagize ati: "Thank you, God, for being so good to me throughout all these years. I am deeply grateful to be alive, for all the blessings, all the lessons I have learned, and everything that has shaped me into who I am today.” Kate kandi yifurije isabukuru nziza abantu bose bavutse mu kimenyetso cya Virgo, kuko ari na cyo kimenyetso cy’inyenyeri abarizwamo. Nubwo Kate Bashabe azwi cyane nk’umunyamideli n’umushoramari, mu myaka ishize yakomeje no kugaragara mu bikorwa bifite aho bihuriye n’urubyiruko n’ubugiraneza. Mu mpera za Kanama 2026, yitabiriye igitaramo cya Gen-Z Comedy cyabereye muri Camp Kigali, aho yari yajyanye ibikoresho by’ishuri yari agamije guha abana batishoboye binyuze muri Rahura. Ubuyobozi bw’iki gitaramo bwaje gusobanura ko Kate yavuye muri icyo gitaramo hakiri kare kubera izindi gahunda yari afite, aho guhakana amakuru yari amaze gukwirakwira ko yaba yararakajwe n’urwenya rw’abanyarwenya. Muri uwo mwaka kandi, Kate yagaragaye mu gitaramo cyo kwizihiza imyaka 30 ya Ambassadors of Christ Choir, aho yagarutse ku kwizera kwe ndetse n’urukundo afitiye abana. Yavuze kandi ko yari ashyigikiye icyo gikorwa binyuze muri Rahura, sosiyete ikora kandi igatanga ibikoresho by’ishuri. Ku rundi ruhande, muri Kanama 2026 Kate yongeye kuvuga ku kibazo cy’abantu bamwiyitirira ku rubuga rwa X, avuga ko adakoresha urwo rubuga kandi ko konti ikoresha amazina ye ari mpimbano. Yatangaje ko yifuza ko RIB ikurikirana icyo kibazo nk'uko byatangajwe na InyaRwanda. Uyu munsi, Kate Bashabe akomeje gukoresha izina amaze kubaka mu myaka isaga 15, ahuza imyidagaduro, imideli, ubucuruzi n’ibikorwa byo gufasha abandi, mu gihe atangiye undi mwaka w’ubuzima bwe.