FIFA irashobora guhagarika igihembo cy’Amahoro yahaye Donald Trump

Iyi ngingo yaganiriweho mu nama y’Inama Nyobozi ya FIFA yabereye i Zurich mu Busuwisi ku wa 15 Ukwakira 2026. Hafashwe icyemezo cyo guha komite ishinzwe imibereho myiza n’inshingano z’umupira w’amaguru inshingano zo gusuzuma niba iki gihembo gikwiye gukomeza gutangwa. Impaka ku gihembo cyahawe Trump FIFA yatangaje iki gihembo mu Ugushyingo 2025, ivuga ko kizajya gihabwa abantu bagize uruhare rudasanzwe mu guteza imbere amahoro no guhuza abantu ku Isi. Mu kwezi kwakurikiyeho, Perezida wa FIFA, Gianni Infantino, yahaye Trump igihembo cya mbere mbere ya tombola y’amatsinda y’Igikombe cy’Isi cya 2026 yabereye i Washington. Icyakora, icyemezo cyo gutanga icyo gihembo nticyari cyemejwe n’Inama Nyobozi ya FIFA, bituma havuka ibibazo ku buryo cyatanzwe. Impaka zongeye gukaza umurego nyuma y’uko Trump atangije ibitero by’indege kuri Irani, amakimbirane akomeza nyuma yo guhabwa icyo gihembo. Icyakora, FIFA ntiyatangaje ko ibyo bitero ari byo byatumye isuzuma ejo hazaza h’iki gihembo. Ni iki gishobora gukurikiraho? Komite igizwe n’abantu 22, irimo Javier Zanetti wahoze akinira Inter Milan n’ikipe y’igihugu ya Argentine, izasuzuma niba igihembo gikwiye gukomeza gutangwa n’amabwiriza yagenga abagihabwa. Mu mahitamo ari imbere yayo harimo guhindura uburyo igihembo gitangwamo, kutazongera kugiha abanyapolitiki cyangwa kugihagarika burundu. Debbie Hewitt, visi-perezida wa FIFA akaba na perezida w’ishyirahamwe ry’umupira w’amaguru mu Bwongereza, yavuze ko komite izasuzuma niba igihembo cyari gikwiye kubaho, uko cyatanzwe n’uko kizakomeza gutangwa. Raporo y’iyo komite itegerejwe mbere y’inama itaha y’Inama Nyobozi ya FIFA, iteganyijwe mu Kuboza 2026 i Doha muri Qatar. Kugeza ubu, nta cyemezo cya nyuma cyo guhagarika iki gihembo cyafashwe. Icyerekezo cyacyo kizamenyekana nyuma y’isuzuma rya komite.