Daniel Levy aracyafite imigabane muri Tottenham nubwo yavuye ku buyobozi

Kuva Levy yeguzwa ku buyobozi, umuryango wa Lewis ushora imari muri Tottenham wakomeje gushyira amafaranga menshi muri iyi kipe, ndetse wemera ko ikora isoko ry’abakinnyi ridasanzwe mu mpeshyi. Muri iri soko, Tottenham yasenye amateka yayo mu bijyanye n’amafaranga yakoreshejwe ku mukinnyi umwe, inahindura gahunda yari isanzweho y’imishahara, aho yaguze abakinnyi bashya 10. Nubwo Levy atakiri mu buyobozi bwa Tottenham, aracyafite umugabane ukomeye muri iyi kipe binyuze mu bigega by’imari by’umuryango we. Urubuga rwa Tottenham ruvuga ko umuryango wa Levy ari “abashobora kungukirwa” n’ibigega by’imari bifite ku buryo bwa nyuma 27.38% by’imigabane ya ENIC, sosiyete na yo ifite 88.30% ya Tottenham Hotspur Limited. Ibi bivuze ko Levy, binyuze muri ibyo bigega by’umuryango, afite hejuru gato ya 24% ya Tottenham Hotspur. Uyu mugabane wavuye hafi kuri 26% nyuma y’uko imigabane ye igabanyijwe mu mpeshyi y’uyu mwaka. Levy yanze kongera gushoramo miliyoni £100 Mu mpeshyi, Tottenham yakoze igikorwa cyo kongera imari ya miliyoni £100, aho Levy yari yarahawe amahirwe yo kongera amafaranga ashoramo kugira ngo agumane umugabane we. Gusa ntiyigeze yitabira icyo gikorwa mbere y’igihe ntarengwa cyashyizweho muri Kanama. Muri Kamena, sosiyete Eight Sports Capital Limited, ifitanye isano n’umushoramari ukomoka muri Hong Kong witwa Wing Fai Ng ndetse n’umushoramari w’Umunyamerika Brooklyn Earick, yatangaje ko yasinyanye amasezerano yo kugura 24.99% bya ENIC Levy yari afite binyuze mu bigega by’umuryango we. Nubwo iyo sosiyete yatangaje ko habayeho amasezerano yo kugura uwo mugabane, kugeza ubu nta tangazo ryemeza ko ubwo bucuruzi bwarangiye ryigeze ritangazwa. Levy rero aracyafite umugabane urenga 24% muri Tottenham, mu gihe amakuru ku bijyanye no kugurisha uwo mugabane akomeje kuba ategereje kwemezwa.