Bizimungu Pasteur Yasabye Banki ya Kigali (BK) Kumufasha Kuzuza Hoteli y’Agaciro Karenga Miliyari 10 Frw

Bizimungu Pasteur wahoze ari Perezida wa Repubulika y’u Rwanda yasabye Banki ya Kigali (BK) kongera imbaraga mu bufatanye bafitanye, kugira ngo abashe kurangiza umushinga wo kubaka hoteli iri ku nkengero z’Ikiyaga cya Kivu mu Karere ka Rubavu. Iyi hoteli iri mu mishinga Bizimungu yatangiye afatanyije na BK, ariko imirimo yo kuyubaka iracyakomeje. Mu ruzinduko yagiriye muri iyi banki, yasabye ko yamufasha kubona ubushobozi bw’amafaranga akenewe kugira ngo inyubako yuzure itangire kwakira abakiriya.Bizimungu yavuze ko imirimo yo kubaka iyi hoteli igeze kure, ariko ko hakenewe izindi mbaraga kugira ngo isozwe mu gihe gito.Yagaragaje ko BK isanzwe ifitanye na we imikoranire muri uyu mushinga, ndetse ko hari amafaranga agomba kwishyura iyi banki. Yagize ati: “Ni hoteli twifuza ko yaba ifite inyenyeri enye. Icyo twifuza kuri BK ni uko yadufasha kuyirangiza, kuko ubu inyubako tuyigeze kure. Ndetse no kuyubaka twari twaratangiye dufatanyije na yo, kandi kugeza ubu hari amafaranga tuyibereyemo.”Uyu mushinga uzaba urimo ibyumba byo kuraramo, resitora enye, icyumba cy’inama gishobora kwakira abantu barenga 1.000 ndetse n’ahantu hateguwe ku buryo abazaba bayisuye bazajya baruhukira bareba imisozi y’ibirunga n’Ikiyaga cya Kivu. Bizimungu yasobanuye ko kugira ngo hoteli yuzure kandi itangire gukora bizasaba amafaranga arenga gato miliyari 10 Frw, nubwo ashobora no kuba munsi y’ayo bitewe n’uko imirimo izagenda.Yavuze ko kuyubaka no kuyitangira bizatanga umusanzu mu guhanga imirimo, kuko biteganyijwe ko izakoresha abantu bari hagati ya 300 na 400.Mu bijyanye n’imicungire yayo, Bizimungu yatangaje ko bari mu biganiro n’abashoramari bane bashobora kuzayifasha mu kuyicunga no kuyiteza imbere. Yagaragaje ko iyi hoteli izibanda cyane ku kwakira ba mukerarugendo n’abandi bantu basura Rubavu bagamije kuruhuka no kwidagadura, ariko ikazatanga n’izindi serivisi zisanzwe ziboneka muri hoteli.Uretse uyu mushinga, Bizimungu yavuze ko yanaganiriye n’Urwego rw’Igihugu rw’Iterambere (RDB) ku buryo ibikorwa remezo byakira inama byakongerwa mu turere, kugira ngo na two tubashe kwakira inama n’amahuriro mpuzamahanga. Ibi byafasha gukomeza guteza imbere ubukerarugendo no gukurura ibikorwa by’ubukungu mu bice bitandukanye by’igihugu.