Beyoncé yafashije abagizweho ingaruka n’umutingito muri Colombia yitanga Miliyoni $1

Beyoncé yatanze miliyoni $1 yo gufasha abahuye n’umutingito muri Colombia Umuhanzikazi w’icyamamare muri Amerika, Beyoncé, yatanze inkunga ya miliyoni imwe y’amadolari (Miliyari imwe na Miliyoni 400 mu mafaranga y'u Rwanda) mu bikorwa byo gufasha abaturage bo muri Colombia bagizweho ingaruka n’umutingito ukomeye w’ubukana bwa 7.4 wibasiye iki gihugu ku wa 10 Kanama 2026. Iyi nkunga yatangajwe ku wa 25 Kanama 2026, itanzwe ku giti cye na Beyoncé binyuze mu bigo biri gukora ibikorwa by’ubutabazi muri Colombia. Amafaranga azibandwaho cyane mu kugeza ibiribwa n’ibikoresho by’amacumbi ku baturage bo mu duce twibasiwe cyane n’uyu mutingito. Umutingito ukomeye wibasiye Colombia Umutingito wari ufite ubukana bwa 7.4 wabereye hafi ya San José del Palmar, mu gace ka Chocó, ku isaha ya saa 7:34 za mu gitondo. Ikigo cya Colombia gishinzwe gukurikirana ibiza n’imitingito cyatangaje ko uyu ari wo mutingito ukomeye kurusha iyindi yose yanditswe muri Colombia mu kinyejana cya 21. Beyoncé yafashe iya mbere mu gutabara abari mu kaga Nk’uko byatangajwe na Parkwood Entertainment, ikigo cya Beyoncé, iyi nkunga ya miliyoni imwe y’amadolari igenewe gufasha mu bikorwa by’ubutabazi biri gukorerwa abaturage bagizweho ingaruka zikomeye n’uyu mutingito. Amafaranga azakoreshwa cyane mu gutanga ibiribwa ndetse n’ibikoresho bifasha kubona aho abantu baba, cyane cyane mu bice birimo amazu yasenyutse cyangwa yangiritse bikomeye. Parkwood Entertainment yanagaragaje ko abantu bafite ubushobozi bwo gutanga ubufasha bashobora kubinyuza mu miryango nka Food For The Poor na World Central Kitchen, iri mu bikorwa byo gufasha abaturage bagezweho n’ingaruka z’iki cyago. Iyi nkunga ya Beyoncé ije mu gihe ibikorwa byo gutabara no gusana ibyangijwe n’umutingito bikomeje, kuko imiryango myinshi yatakaje amacumbi ndetse n’ibikorwaremezo byinshi byangiritse. Umutingito wahitanye abantu benshi, usiga ababarirwa mu bihumbi badafite amacumbi Umutingito wo ku wa 10 Kanama wagize ingaruka ku bice byinshi bya Colombia, aho Chocó iri mu byibasiwe cyane. Raporo yatangajwe na UNGRD ku wa 19 Kanama yari ivuga ko abantu 312 bari bamaze kwitaba Imana, abandi 4,380 barakomereka, naho 290 bakaba bakiburiwe irengero. Muri icyo gihe, abantu barenga 294,000 bari bamaze gutangazwa ko bagizweho ingaruka n’uyu mutingito. Imibare yakomeje kuvugururwa uko ibikorwa byo gushakisha no gusuzuma ibyangiritse byakorwaga. Raporo ya EFE yo ku wa 26 Kanama, ishingiye ku makuru ya UNGRD, yari imaze kuvuga ko umubare w’abapfuye wageze kuri 331, abakomeretse bakaba 4,439, mu gihe 240 na n'ubu baburiwe irengero. Ibi byatumye ibikorwa byo gutanga ibiribwa, aho kuba n’ibindi bikoresho by’ibanze bikenerwa cyane. Beyoncé si we wenyine watanze ubufasha Inkunga ya Beyoncé ije ikurikira ibikorwa bitandukanye by’ubutabazi byakozwe n’abandi bahanzi bakomeye bo muri Colombia ndetse n’abandi bantu bafite ubushobozi, bagamije gufasha abaturage kongera kubaka ubuzima nyuma y’iki cyago. Shakira yatanze miliyoni $1.25 mu bikorwa byo kubaka amashuri Umuhanzikazi Shakira na we yifatanyije n’abaturage ba Chocó, cyane cyane mu gufasha gusana ibikorwa by’uburezi byangijwe n’umutingito. Ku wa 17 Kanama, Shakira yasuye Quibdó, ahura n’abaturage, abana n’abarezi bagizweho ingaruka n’uyu mutingito. Yatangaje gahunda yo gushaka miliyoni $1.25 zo gufasha mu gusana amashuri yangiritse no gufasha abana gusubira mu mashuri. Iyo nkunga igizwe na: $500,000 yatanzwe na Shakira na Live Nation; $500,000 yatanzwe na FIFA Global Citizen Education Fund; $250,000 yatanzwe na CAF, Banki y’Iterambere ya Amerika y’Epfo. Amashuri hafi 200 yari amaze gutangazwa ko yangiritse, harimo n’agera kuri 40 yari yangiritse bikomeye cyane. Shakira yavuze ko amashuri atari inyubako gusa, ahubwo ko afasha abana kubona ituze, gahunda isanzwe y’ubuzima ndetse n’ahantu hatekanye ho kwigira nyuma y’ibiza. Byongeye kandi, Howard G. Buffett Foundation yemeye gufasha mu kubaka amashuri mashya 10 muri Chocó, mu rwego rwo gukomeza igikorwa cyo gusana ibikorwa by’uburezi byangijwe n’uyu mutingito nk'uko tubicyesha Global Citizen. Karol G yatanze miliyoni $1.2 binyuze muri Con Cora Undi muhanzikazi w’Umunya-Colombia, Karol G, na we yagaragaje uruhare rwe mu bikorwa byo gufasha abagezweho n’ingaruka z’umutingito. Ku wa 23 Kanama, yitabiriye mu buryo bw’ikoranabuhanga igitaramo cy’ubutabazi cyabereye i Bogotá cyiswe “Colombia: Voces por la Vida”, cyari kigamije gukusanya amafaranga yo gufasha imiryango yahuye n’ingaruka z’umutingito. Muri icyo gikorwa, Con Cora Foundation, umuryango w’ubugiraneza wa Karol G, yatangaje inkunga ya miliyoni $1.2 igenewe ibikorwa byo gutabara no gufasha abahuye n’ingaruka z’uyu mutingito. Igitaramo ubwacyo cyahuje abahanzi barenga 30, barimo Karol G, Maluma, Sebastián Yatra, Greeicy, Eladio Carrión n’abandi, ndetse gikusanya amafaranga arenga miliyoni 3 z’amadolari yo gufasha abaturage. Morat yatanze kimwe cya kabiri cy’amafaranga yavuye mu bitaramo Itsinda ry’abahanzi bo muri Colombia, Morat, na ryo ryafashe icyemezo cyo gutanga kimwe cya kabiri cy’amafaranga yavuye mu bitaramo byaryo i Bogotá kugira ngo afashe mu gusana amashuri yangijwe n’umutingito. Muri gahunda y’ibitaramo bitandatu bakoze muri Movistar Arena hagati ya tariki 14 na 23 Kanama, Morat yashyizeho n’ahantu hatandukanye ho kwakira inkunga y’abafana, amafaranga akazanyuzwa muri UNICEF. Ibi byatumye ibitaramo bitaba iby’umuziki gusa, ahubwo binaba uburyo bwo gukusanya ubufasha no gukangurira abantu kugira uruhare mu gusana ibyangijwe n’uyu mutingito. Abahanzi bahuje imbaraga mu gufasha Colombia Uruhare rw’abahanzi muri ibi bikorwa rugaragaza uburyo abantu bafite izina n’ababakurikirana benshi bashobora gukoresha ijwi n’ubushobozi bafite mu gufasha abaturage mu bihe bikomeye. Kuva ku nkunga ya Beyoncé igera kuri miliyoni $1, iya Karol G ya miliyoni $1.2, iya Shakira n’abafatanyabikorwa bayo ya miliyoni $1.25, kugeza ku bikorwa bya Morat n’abandi bahanzi bitabiriye ibitaramo byo gukusanya inkunga, ibikorwa by’ubugiraneza bikomeje kuba igice cy’ingenzi mu guhangana n’ingaruka z’uyu mutingito. Ku ruhande rwa Beyoncé, iyi nkunga nshya yongerera imbaraga ibikorwa bye byo gufasha abantu mu bihe by’ibibazo n’ibiza, ikaba ari n’ubutumwa bwo gukangurira abandi bantu bafite ubushobozi kugira uruhare mu gutabara abaturage ba Colombia. Kuri ubu, ibikorwa byo gutabara no gusana ibyangijwe n’umutingito biracyakomeje, mu gihe abaturage benshi bagikeneye amacumbi, ibiribwa n’ibindi bikoresho by’ibanze, ndetse n’aho amashuri n’ibikorwaremezo byangiritse hakaba hakenewe imbaraga nyinshi kugira ngo ubuzima busubire ku murongo nk'uko bitangazwa na Forbes.