Abapolisi babiri bafunzwe nyuma yo gufata umukobwa muri Gare ya Rubavu ngo yambaye nabi

Rubavu — Inkuru y’abapolisi babiri bafashwe mu mashusho muri Gare ya Rubavu bafata umukobwa bashinjaga kwambara nabi, yatunguye abantu benshi, nyuma y’uko Polisi y’u Rwanda itangaje ko abo bapolisi bafunzwe. Amashusho yakwirakwiye ku mbuga nkoranyambaga agaragaza abo bapolisi bafata umukobwa, bamushinja imyambarire bavuga ko ikanzu yari yambaye yari ngufi. Nyuma y’iperereza, Polisi y’u Rwanda yatangaje ko abo bapolisi bombi batawe muri yombi kandi bafunzwe, mu gihe umukobwa wari wafashwe we yarekuwe nyuma yo gusanga nta kosa yakoze. Polisi kandi yavuze ko abapolisi bose bahawe amabwiriza kandi bakihanangirizwa kugira ngo ibikorwa nk’ibi bitazongera kubaho. Polisi y’Igihugu yanditse ku rubuga rwa X iti: “Muraho, Abapolisi bagaragara muri aya mashusho bafashwe ndetse barafungwa. Uwo mukobwa na we yarenganuwe. Abapolisi bose bahawe amabwiriza ndetse barihanangirizwa ko bagomba kwirinda ko ibikorwa nk’ibi byongera kubaho. Murakoze.” Iyi nkuru yongeye kubyutsa impaka ku mbuga nkoranyambaga ku bijyanye n’imyambarire mu ruhame, uburenganzira bw’umuturage n’imbibi z’ububasha bw’abashinzwe umutekano. Ikibazo benshi bakomeje kwibaza ni iki: 'ese ni hehe ububasha bw’umupolisi burangirira iyo ari gukumira imyitwarire abona ko idakwiye?'