Abakinnyi 10 bari mu 650 ba mbere ku Isi batangiye guhatanira Rwanda Open M25

Ku bibuga bya Tennis biri muri IPRC Kigali hatangiye irushanwa mpuzamahanga rya “Rwanda Open M25”, ryitabiriwe n’abakinnyi babigize umwuga baturutse mu bihugu bitandukanye, harimo 10 bari mu bakinnyi 650 ba mbere ku Isi.

Iri rushanwa ryatangiye kuri uyu wa Mbere, tariki ya 28 Nzeri 2026, rikaba riri mu ngengabihe ya ITF World Tennis Tour, aho abakinnyi bahatanira amanota abafasha kuzamuka ku rutonde rw’abakinnyi ba Tennis ku Isi rwa ATP.

“Rwanda Open M25” rizamara ibyumweru bibiri, aho icyumweru cya mbere giteganyijwe kuva ku wa 28 Nzeri kugeza ku wa 4 Ukwakira, naho icyumweru cya kabiri kikazatangira ku wa 5 Ukwakira kigasoza ku wa 11 Ukwakira 2026. ITF igaragaza ko buri cyumweru cy’iri rushanwa gifite ibihembo bya 30,000 by’amadolari y’Amerika.

Abakinnyi bakomeye bitezwe i Kigali

Muri iri rushanwa harimo abakinnyi bafite imyanya myiza ku rutonde rwa ATP, barimo Umuholandi Max Houkes, uri ku mwanya wa 240 ku Isi, Umufaransa Florent Bax uri ku wa 303 ndetse na Calvin Hemery uri ku wa 328.

Hari kandi Umufaransa Corentin Denolly, uri ku mwanya wa 440, Umunya-Algeriya Toufik Sahtali uri ku wa 553, Umunya-Afurika y’Epfo Alec Beckley uri ku wa 566 ndetse n’Umunya-Isiraheli Yshai Oliel uri ku wa 589.

Abandi bakinnyi bari muri 650 ba mbere ku Isi bitezwe muri iri rushanwa ni Umuhinde S.D. Prajwal Dev uri ku mwanya wa 617, Umudage Marlon Vankan uri ku wa 618 ndetse n’Umunya-Argentine Ignacio Monzon uri ku wa 631.

Rwanda Open M25 imaze kuba urubuga rw’ababigize umwuga

Rwanda Open M25 yatangiye kuzamurwa ku rwego rw’amarushanwa y’ababigize umwuga mu 2023, nyuma y’uko mbere yari isanzwe yitabirwa cyane n’abakinnyi bo mu Rwanda no mu karere.

Kuva icyo gihe, Kigali yakomeje kwakira abakinnyi baturuka mu bice bitandukanye by’Isi, bigatuma iri rushanwa ribona umwanya muri gahunda ya ITF World Tennis Tour.

Mu 2025, Umufaransa Corentin Denolly yegukanye icyumweru cya mbere cya Rwanda Open M25, mbere y’uko Umuholandi Max Houkes yegukana icyumweru cya kabiri. Denolly kandi ni we umaze kwegukana iri rushanwa inshuro nyinshi kuva ryazamurwa ku rwego rw’ababigize umwuga.

Abanyarwanda na bo barashaka amahirwe

U Rwanda na rwo rufite abakinnyi barimo guhatanira kubona umwanya wo kwigaragaza imbere y’abakinnyi mpuzamahanga bitabiriye iri rushanwa.

Mu bakinnyi b’Abanyarwanda bavugwa nk’abafite amahirwe yo guhabwa wild card muri main draw harimo Ishimwe Claude na Niyigena Étienne, bari mu bakinnyi bahagaze neza ku rwego rw’igihugu.

Rwanda Open M25 rero si amarushanwa asanzwe gusa, kuko abakinnyi bayitabira bahatanira amanota ya ATP ndetse n’ibihembo by’amafaranga, mu gihe u Rwanda rukomeza gukoresha iri rushanwa mu guteza imbere Tennis no guha abakinnyi b’Abanyarwanda amahirwe yo guhura n’abakinnyi bafite ubunararibonye ku rwego mpuzamahanga.