Abahanga bagaragaje uburyo 3 bwafasha umuntu gukomera mu mutwe no gutsinda ibimuca intege

Dore uburyo butatu abahanga mu myitwarire n’imikorere yo mu mutwe basaba abantu gukoresha.

1. Kora ibyo udashaka ariko uzi ko bikugirira akamaro Umutoza Brian Cain akoresha uburyo yise “Suck List”, ni ukuvuga urutonde rw’ibintu umuntu adakunda gukora ariko azi ko bimufitiye akamaro. Bimwe mu ngero harimo kubyuka ku isaha ya mbere y’impuruza, gusoma buri munsi cyangwa gufata iminota mike yo gutuza no gutekereza. Igitekerezo nyamukuru ni uguhitamo igihe cyangwa ikimenyetso kizajya kikubera intangiriro yo gukora icyo gikorwa. Iyo umuntu akomeje kubikora nubwo bitamworoheye, ashobora kubaka umuco wo kudacika intege. 2. Tegura imyitozo y’umutwe imara hafi iminota ibiri Jason Selk, wigeze gukorana n’amakipe y’imikino ikomeye, avuga ko gukomera mu mutwe bishobora kwitozwa nk’uko umubiri witozwa. Yateguye imyitozo y’intambwe eshanu ishobora kumara hafi iminota 1 n’amasegonda 40. Harimo guhumeka no gutuza, kwibanda ku bintu by’ingenzi ushaka kugeraho, kwibutsa ibintu wakoze neza, kwiyibutsa intego zawe no kongera gukora umwitozo wo guhumeka. Selk asaba abakinnyi kuyikora nibura inshuro eshatu mu cyumweru kandi ntibareke iminsi irenga itatu hagati y’imyitozo ibiri.

3. Wige kugenzura umubiri n’ibitekerezo ukoresheje guhumeka Kensa Gunter, wakoranye na Atlanta Hawks, asobanura ko gukomera mu mutwe atari impano imwe umuntu avukana, ahubwo ko ari ubushobozi butandukanye umuntu ashobora guteza imbere. Brett Haskell we ashimangira akamaro ko kwitoza guhumeka mu buryo bugenzuwe. Iyo umuntu ahangayitse cyangwa arakaye cyane, ibitekerezo bishobora gutangira kudakora neza. Aho gufata umwuka mwinshi ukawufata igihe kirekire, Haskell asaba guhumeka winjiza umwuka mu gihe cy’amasegonda ane, hanyuma ugasohora umwuka buhoro kandi igihe kirekire. Iyo bikorwa kenshi, bishobora gufasha umuntu gutuza, gutekereza neza no gufata ibyemezo mu buryo butuje. Mu ncamake, gukomera mu mutwe si ikintu umuntu agomba gutegereza ko kimugeraho. Abahanga bavuga ko bishobora kubakwa buhoro buhoro binyuze mu myitozo, gukora ibintu bigoye ariko bifitiye umuntu akamaro, kwibanda ku ntego no kwiga kugenzura umubiri n’ibitekerezo.